Լարված իրավիճակ «Վերնիսաժում». առևտրականներին արգելում են առևտուր անել
Այսօր առավոտյան լարված իրավիճակ է ստեղծվել «Վերնիսաժում»։ Ոստիկանության աշխատակիցները «Վերնիսաժի» հարևանությամբ առևտրով զբաղվող մոտ 100 առևտրականի արգելել են սկսել իրենց գործը։
Tert.am-ի հետ զրույցում Ոստիկանության լրատվության և հասարակայնության հետ կապերի վարչությունից հայտնեցին, որ Երևանի քաղաքապետարանի և «Վերնիսաժի» տնօրինության որոշմամբ՝ ձեռագործ և ապակե իրերի առևտրով զբաղվողների սեղանիկները հավաքվել էին, իսկ առևտրականների առաջ արգելք էր դրվել:
Ոստիկանությունից պարզաբանեցին, որ իրենք իրենց գործն են արել՝պահպանել են հասարակական կարգը։
Shamshyan.com-ի տվյալներով՝ առևտրականներն ասել են, որ արդեն 20 տարի է իրենք այստեղ շաբաթ և կիրակի օրերին աշխատում են, դրանով վաստակում են իրենց օրվա հացը: Նրանց խոսքով՝ իրենց նախօրոք չեն զգուշացրել ու առաջարկություններ չեն արվել՝ այլ տեղեր տեղափոխվելու:













