Ռուսաստանում 1 օրում ավելի քան 25.000 մարդ է տարհանվել պայթյունների սպառնալիքի մասին ահազանգերի պատճառով

11:08 • 23.09.17

Ռուսաստանի 4 քաղաքում, այդ թվում՝ մայրաքաղաք Մոսկվայում, ուրբաթ տարհանվել է ավելի քան 25.000 մարդ՝ պայթյունների սպառնալիքի մասին ահազանգերի պատճառով: Շենքերի ականապատված լինելու մասին տեղեկությունը կեղծ է եղել:

Ինչպես գրում է РИА Новости գործակալությունը, ահազանգեր են հնչել՝ կապված երկրի տարածքում գտնվող 87 տարբեր օբյեկտների հետ:

Մոսկվայում մարդիկ են տարհանվել տարածքային վարչությունների 15 շենքերից, նաև մեկ առևտրի կենտրոնից:

Ահազանգեր են հնչել նաև Դաղստանում, տարհանումներ են իրականացվել 10 վարչական շենքից, 6 առևտրային օբյեկտից և 21 ուսումնական հաստատութունից:


Ահաբեկչության մասին կեղծ ահազանգերի ալիքը Ռուսաստանում չի դադարում արդեն երկրորդ շաբաթը: Թեմայի մասին տեղեկացված է նաև ՌԴ նախագահ Վլադիմիր Պուտինը, այժմ աշխատանքներ են տարվում մեղավորներին գտնելու և պատժելու համար:

Ավելի վաղ տեղեկություն էր տարածվել, որ կեղծ ահազանգեր կատարողները կապված են «Իսլամական պետություն» ահաբեկչական խմբավորման հետ և գտնվում են արտասահմանում: Նրանց նկատմամբ հետախուզում կհայտարարվի: