Եթե ՀՀ պարտքը 2 տարի շարունակեր իր վարքագիծը, միջազգային կառույցների և օտարերկրյա ներդրողների արձագանքները բացասական կլինեին. Վարդան Արամյան

13:05 • 25.09.17

ՀՀ ֆինանսների նախարար Վարդան Արամյանն այսօր հրավիրված ասուլիսին ներկայացրեց իր ղեկավարած ոլորտի մեկ տարվա գործունեությունը` սկսելով հարկաբյուջետային քաղաքականությունից:

Նախարարը հիշեցրեց, որ պետությունը 2014-2015թթ.-ին գտնվել է ճգնաժամային իրավիճակում, և պարտքի ցուցանշը բարձրացել է 13 տոկոսային կետով, սակայն միջազգային հեղինակավոր ռեյտինգավորող կառույցները չեն փոխել իրենց դիրքորոշումը՝ այդ թվում նաև Արժույթի միջազգային հիմնադրամը:

«Իրականում եթե պարտքը երկու տարվա մեջ շարունակի իր վարքագիծը, բնականաբար և՛ միջազգային կառույցների և՛ օտարերկրյա ներդրողների կողմից արձագանքները կլինեն բացասական։ Բայց լավ տենդենցներ ունենք, գնահատվել է, որ 2018-20թթ.-ի հարկաբյուջետային քաղաքականությունը խելամիտ է և կայուն»,-ասաց նա:

Նախարարը դրական ցուցիչ համարեց նաև 2018-20թթ.-ի հարկաբյուջետային քաղաքականության վերաբերյալ միջազգային ներդրողների արձագանքը:

«Ներդրումներ կատարող տնտեսվարող սուբյեկտների քաղաքականությունը ևս դրական է»,-ասաց նա և նշեց, որ սանդղակին հետևելով՝ եկամտաբերությունը տոկոսադրույքներում նկատելի է:

Վարդան Արամյանը նշեց, որ եռամսյակը մեկ ներդրողների հետ աշխատանք են տանում, քաղաքականության ուղղությունների մասին տեղեկատվություն տալիս, և այստեղ էլ միջնաժամկետ ծրագրից հետո ազդակները դրական են:

Ներքին պարտքի շուկային անդրադառնալով՝ նախարարը ասաց, որ առաջին անգամ 30 տարի մարման ժամկետով պարտատոմսեր են թողարկվել՝ առանց տոկոսադրույքների բարձրացման, և սա կարևոր գործիք է ֆինանսական շուկայում կայունություն ապահովելու համար:

Վարդան Արամյանը հավելեց, թե այն պարտքի կառավարման ոլորտում էական ձեռքբերում է, քանի որ այն հնարավորություն է տալիս, որ տոկոսադրույքներն էապես նվազեն:

Նախարարը նշեց, որ ԿԲ-ի հետ համատեղ ծրագիր են իրականացրել, և տոկոսադրույքների նվազման ապահովման և առաջնային տեղաբաշխումները տեղափոխվել են բորսա:

Հարկային քաղաքականության անդրադառնալով՝ նախարարն ասաց, որ այսօր ունեն կրկնակի հարկումը բացառող համաձայնագիր շուրջ 46 երկրների հետ, և միասնական ձևով սահմանվում են ընդհանուր գործիքներ:

«Կարևոր է նաև ներդրումների տեսակետից՝ ներդրողները կոմֆորտ են զգում, որ գործիքները միատեսակ են գործում»,-ասաց նա և հավելեց, որ առաջիկա 5 տարիներին կրկնակի հարկման հետ կապված նոր համաձայնագրեր կստորագրվեն ։