Իրաքյան Քրդստանը վերահսկում է Թուրքիայի հետ սահմանը. Քրդստանի նախագահի խորհրդական
Իրաքյան Քրդստանը պահպանում է Թուրքիայի հետ սահմանի նկատմամբ վերահսկողությունը: Այդ մասին «ՌԻԱ Նովոստի»-ին տված հարցազրույցում հայտարարել է Իրաքյան Քրդստանի նախագահի խորհրդական Քեֆահ Մահմուդը:
«Թուրքիայի հետ սահմանին անցակետերն աշխատում են սովորական ռեժիմով, ոչինչ չի փոխվել: Ո՛չ թուրքական կառավարության, ո՛չ Քրդստանի ղեկավարության կողմից ոչ մի քայլ չի ձեռնարկվել: Անցակետերը միշտ եղել և մինչև հիմա մնում են մեր հսկողության տակ»,- ասել է Քեֆահ Մահմուդը:
Խորհրդականի խոսքով՝ իրաքյան իշխանությունների փորձը՝ վերահսկողություն սահմանել սահմանային անցակետերի նկատմամբ, «հակասում է Իրաքի սահմանադրությանը և դաշնային օրենքներին»:
Մեկնաբանելով Քրդստանի օդանավակայանների հետ օդային հաղորդակցության դադարեցումը՝ Քեֆահ Մահմուդը նշել է, որ ոչ մի ինքնաթիռ այսպես, թե այնպես չի կարող վայրէջք կատարել կամ թռիչք կատարել Էրբիլի և Սուլեյմանիայի օդանավակայաններից՝ առանց Բաղդադում դաշնային ավիացիոն կառավարության թույլտվության: Նա պարզաբանել է, որ այդ կարգը գոյություն ունի 2008 թվականից ի վեր:
Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:
Իրաքի վարչապետ Հայդեր ալ Աբադին հանրաքվեն անվանել է հակասահմանադրական և հայտարարել է, որ Իրաքն այն չի ընդունելու: Իրաքի իշխանությունները նաև հայտարարել են, որ բանակցություններ չեն վարելու Քրդստանի շրջանային կառավարության հետ քվեարկության արդյունքների վերաբերյալ: Հանրաքվեի անցկացման դեմ են հանդես եկել Թուրքիան և Իրանը, ինչպես նաև ԱՄՆ-ն և ՄԱԿ-ը:










