Պուտինը մեկնաբանել է Հյուսիսային Կորեային ուղղված հարվածի հավանականությունը

17:31 • 04.10.17

Ռուսաստանի Դաշնության նախագահ Վլադիմիր Պուտինը «Ռուսական էներգետիկ շաբաթ» համաժողովի նիստի ժամանակ մեկնաբանել է Հյուսիսային Կորեային ուղղված հարվածի հավանականությունը, հայտնում է lenta.ru-ն:

«Եկեք ուղիղ խոսենք: Կարելի՞ է գլոբալ հարված հասցնել Հյուսիսային Կորեային, կարելի՛ է: Դա արդյունք կտա՞, պարզ չէ: Ո՞վ գիտի՝ այնտեղ ինչ կա քողարկված»,-ասել է ՌԴ ղեկավարը:

Պուտինի կարծիքով՝ Հյուսիսային Կորեայի շուրջ ստեղծված ճգնաժամային իրավիճակը հնարավոր է լուծել միայն  բոլոր կողմերից հնչող հռետորաբանության մակարդակի նվազեցման, ինչպես նաև Վաշինգտոնի ու Փհենյանի միջև ուղիղ բանակցությունների հաստատման միջոցով:

«Միայն այդ դեպքում է հնարավոր հավասարակշռված, ընդունելի լուծում գտնել»,-ասել է նա:

Հիշեցնենք, որ վերջին ամիսներին Հյուսիսային Կորեան հայտնվել է պատերազմի սկսման սպառնալիքի տակ՝ իր վիճահարույց միջուկային ու հրթիռային ծրագրերի զարգացման պատճառով: ԱՄՆ-ն ու հարակից պետությունները պահանջում են Փհենյանից վերջ տալ սադրանքներին ու բալիստիկ հրթիռների փորձարկումներին: Մինչդեռ պաշտոնական Փհենյանը սպառնում է մոխրի վերածել Միացյալ Նահանգները: