Դպրոցներում և մանկապարտեզներում սուր շնչառական հիվանդությունների կտրուկ աճ կա. գլխավոր ինֆեկցիոնիստ
Վերջին շրջանում դպրոցներում և մանկապարտեզներում սուր շնչառական հիվանդությունների կտրուկ աճ է գրանցվել, բայց իրավիճակը վերահսկելի է: Այս մասին այսօր կայացած մամուլի ասուլիսի ժամանակ ասաց Նորքի Ինֆեկցիոն կլինիկական հիվանդանոցի տնօրեն, ՀՀ առողջապահության նախարարության գլխավոր ինֆեկցիոնիստ Արա Ասոյանը:
«Այս վարակը գրիպ չէ։ Գրիպը նույնպես սուր շնչառական հիվանդություն է, բայց սա ավելի ծանր տեսակ է, որին բնորոշ են շատ բարդություններ, ծանր ընթացք և այլն: Այն, ինչ մենք այսօր ունենք, դա ուղղակի սուր շնչառական վիրուս է»,- նշեց Արա Ասոյանը:
Սուր շնչառական հիվանդությունների աճի պատճառները բազմաթիվ են, բայց հիմանականը, ըստ նրա, վերջին օրերին ջերմաստիճանի կտրուկ իջեցումն է:
«Այս տարին բացառություն չէ։ Ինչպես ամեն տարի այս ժամանակահատվածում լինում է հիվանդությունների աճ, որն արտահայտվում է ջերմությամբ, հազով, քթից լորձ է հոսում, մի մասի մոտ կարող է արտահայտվել նաև անգինայով, բայց բարդությունները բավական քիչ են»,- հայտնեց նա:
Գլխավոր ինֆեկցիոնիստը բոլոր քաղաքացիներին հորդորում է երեխայի մոտ հիվանդություն հայտնաբերելու դեպքում դիմել տեղամասային կլինիկա, որևէ դեպք պետք չէ թաքցնել, որովհետև դա բարդացնում է աշխատանքը: Ասոյանը նշեց, որ չի կարող հստակ վիճակագրություն ներկայացնել, քանի որ թվերն իրական պատկերը չեն արտահայտում։ Նա միայն տեղեկացրեց, որ Նորքի Ինֆեկցիոն կլինիկական հիվանդանոց օրական միջինում 8-10 երեխա է դիմում:
Ասոյանի խոսքով՝ այժմ տարածված սուր շնչառական վիրուսը օդակաթիլային ճանապարհով փոխանցվող է և դժվար է խուսափել դրանից. «Խուսափելու համար պետք է հիվանդ երեխային դպրոց կամ մանկապարտեզ չուղարկեն, որովհետև հենց դպրոցներն ու մանկապարտեզներն են այդ հիվանդությունը տարածողը: Կարծում եմ՝ աշնանային արձակուրդը կազդի չտարածման վրա»,- ասաց նա:
Ինչ վերաբերում է մարզերում ջրծաղիկի ավելացման դեպքերին, Արա Ասոյանը նշեց, որ արդեն 7 տարի է Հայաստանում ջրծաղիկ հիվանդությունը կա՝ ոչ միայն մարզերում, այլ նաև Երևանում, բայց այժմ սարսափեցնող թվեր չկան:
Ըստ նրա՝ այս շրջանում տարածված հիվանդություններից հատկապես զգույշ պետք է լինեն երեխաները, տարեցները և խրոնիկական հիվանդություն ունեցող մարդիկ, որոնք ավելի ծանր են տանում հիվանդությունները:










