Մյանմայում գեղեցկության թագուհուն զրկել են տիտղոսից՝ ռոհինջա մուսուլմանների մասին տեսանյութի պատճառով
Մյանմայում (Բիրմա) գեղեցկության թագուհի Շվի Էայն Սին հայտարարել է, որ իրեն զրկել են գեղեցկության մրցույթի հաղթողի տիտղոսից, քանի որ ինքը Facebook-ում կիսվել է ռոհինջա մուսուլմանների վերաբերյալ քննադատական տեսանյութով:
Ինչպես նշում է Al Arabiya-ն, Մյանման բուդդիստական երկիր է, որտեղ լուրջ կոնֆլիկտ կա ռոհինջա մուսուլմանների հետ: Մյանմայի բանակը մեղադրվում է երկրի արևմուտքում ռոհինջաների դեմ ուղղված էթնիկ զտումներ իրականացնելու համար:
Հայտնի է, որ գրաֆիկական տեսանյութում Սին ռոհինջա մուսուլմաններին մեղադրում է մեդիաարշավ կազմակերպելու ու աշխարհին թյուրիմացության մեջ գցելու համար:
Տեսանյութում գեղեցկուհին խոսում է, մինչ ցուցադրվում են արնաշաղախ մարդկանց, մերկ երեխաների լուսանկարներ:
Տեսանյութի տարածումից հետո գեղեցկության մրցույթի կազմակերպիչները հայտարարել են, որ Շվի Էայն Սին այլևս զրկված է գեղեցկուհու տիտղոսից, քանի որ խախտել է պայմանագրի կանոնները:
Հիշեցնենք, որ օգոստոսի 25-ից ի վեր՝ Մյանմայի իշխանությունների ու ռոհինջա մուսուլմանների միջև լարվածության սրացումից առ այսօր երկրից հարևան Բանգլադեշ է փախել ավելի քան կես մլն ռոհինջա:











