Շվեդիայի օդանավակայանում երիտասարդը փորձել է «Սատանայի մայր» պայթուցիկներն ինքնաթիռի սրահ անցկացնել. նա ձերբակալված է (լուսանկարներ)
Շվեդիայի ոստիկանությունը հայտարարել է, որ 30 տարին չբոլորած, ծագումով գերմանացի երիտասարդը փորձել է ինքնաթիռի սրահ պայթուցիկներ անցկացնել:
Ինչպես նշում է The Daily Mail-ը, միջադեպը տեղի է ունեցել Գյոթեբորգի Լանդվեթեր օդանավակայանում:
Դեպքի վայր կանչված ոստիկաններն ու պայթուցիկների վնասազերծման գծով մասնագետները երիտասարդի ուղեբեռում հայտնաբերել են «Սատանայի մայր» կոչվող պայթուցիկներ:
Շվեդական լրատվամիջոցները հրապարակել են լուսանկար, որում երևում է՝ ինչպես են կասկածյալին դուրս բերում օդանավակայանից: Հայտնի է, որ նա պատրաստվում էր մեկ այլ եվրոպական երկիր մեկնել:
Նշվում է, որ գերմանացին հերքել է իր դեմ բոլոր մեղադրանքները:
Պարբերականը մանրամասնում է, որ «Սատանայի մայր» կոչվող պայթուցիկները, որոնք օգտագործվել են 2015թ. Փարիզում և 2017թ. Մանչեսթերում իրագործված ահաբեկչությունների ժամանակ, չափազանց դժվար են հայտնաբերվում:














