Հս. Կորեայի հետ ԱՄՆ-ի դիվանագիտությունը կշարունակվի նախքան առաջին ռումբի ընկնելը. Թիլերսոն
Միացյալ Նահանգների պետքարտուղար Ռեքս Թիլերսոնը, անդրադառնալով Հյուսիսային Կորեայի շուրջ ստեղծված ճգնաժամային իրավիճակին, հայտարարել է, որ նախագահ Դոնալդ Թրամփից Փհենյանի հարցում դիվանագիտական ջանքերը շարունակելու ցուցում է ստացել:
Ինչպես տեղեկացնում է Reuters-ը, Թիլերսոնն ընդգծել է, որ «Հյուսիսային Կորեայի հետ դիվանագիտությունը կշարունակվի նախքան առաջին ռումբի ընկելը»:
Աղբյուրը հիշեցնում է, որ ավելի վաղ Թրամփը Twitter-ում հայտարարել էր, որ Թիլերսոնը զուր ժամանակ է վատնում՝ փորձելով բանակցել Հյուսիսային Կորեայի հետ:
Ի հակադրություն նախագահի հայտարարությանը պետքարտուղարը նշել է, որ Թրամփն իրեն հստակ ասել է շարունակել դիվանագիտական ջանքերի գործադրումը: Պետքարտուղարը մանրամասնել է, որ այժմ ինքն ակտիվ բանակցում է Չինաստանի հետ, որպեսզի Պեկինը գործադրի Փհենյանի նկատմամբ ունեցած ազդեցության լծակներն ու ճգնաժամային իրավիճակը հնարավոր լինի հարթել:
Թիլերսոնն ընդգծել է, որ Չինաստանը շատ լավ հասկանում է Վաշինգտոնի դիրքորոշումը:
Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել է, որ «միայն մի բան կաշխատի» Հյուսիսային Կորեայի հետ հարաբերություններում՝ Փհենյանի հետ ԱՄՆ նախորդ վարչակազմերի ապարդյուն բանակցություններից հետո: Թրամփը չի հստակեցրել, թե ինչ նկատի ուներ, բայց նրա խոսքերը ևս մեկ անգամ վկայում են, որ նրա մտքին ռազմական գործողությունն է:
Թրամփը նախկինում հայտարարել է, որ Միացյալ Նահանգներն անհրաժեշտության դեպքում իրեն և իր դաշնակիցներին Փհենյանի միջուկային սպառնալիքներից պաշտպանելու համար «ամբողջովին կոչնչացնի» Հյուսիսային Կորեան:










