Երևանում երթուղայինների վարորդները գործադուլ են անում (տեսանյութեր, թարմացվում է)

11:15 • 16.01.18


12։16


Գործադուլ անող վարորդների հետ բանակցելու էր եկել Երևանի քաղաքապետարանի տրանսպորտի վարչության պետ Հենրիկ Նավասարդյանը, նա նշեց, որ իրենք աշխատում են սպասարկողների հետ:

«Աշխատում ենք ամեն ինչ անել, որ երթևեկեն, քաղաքացիները ոչ մի բանով մեղավոր չեն, իսկ թանկացումների հետ կապված կտրվի համապատասխան լուծում: Այս պահի դրությամբ ոչինչ չեմ կարող ասել, ամեն երթուղում մի քանի մեքենա աշխատում են, մեր նպատակը քաղաքացիները երթևեկությունը կազմակերպվի»,-ասաց Նավասարդյանը:

Հարցին, թե ինչպես է տեսնում ստեղծված իրավիճակից ելքը, նա նշեց. «Ելքը չեմ կարող տեսնել, տրանսպորտի նախարարությունը և ԱԺ-ն այս հարցը բարձրացրել են, քննարկման փուլում է»,-ասաց նա:

Ի պատասխան հարցի, թե ուղեվարձի թանկացում հնարավոր է լինի, Նավասարդյանը մեջբերեց վարորդների ասածը, ըստ որի, պետք չէ թանկացնել, իրենք 100 դրամով կաշխատեն, եթե գազի գինը իջնի:


11.52 


Գործադուլ անող վարորդներից մեկը նշեց, որ 270 դրամով «խաբում, մարդկանց վրա գազ են ծախում»։  

Այլ վարորդներ նշեցին՝ իրենք գազի գնի թանկացման հետևանքով 1500-2500 դրամ ավել են վճարում:  

«Իմ հարազատներին ես Նոր տարուն չեմ տեսել։ 8-9 հազար դրամով գազ էի լցնում, 13-14 հազար էլ պլան էի մուծում։ Հիմնարկի վրա հարկեր են դրված, գազը բարձրանում է՝ տուժում է վարորդը, գոնե գազը էժանացնեին, օրվա մեջ 2500 դրամի տարբերություն է տալիս, ամիսը գալիս է 40 հազար դրամ։ Հիմա գամ ծառերի տակ մաքրեմ, ինձ 45 հազար դրամ կտան, էլ ինչի՞ գնամ էշություն անեմ: Չհաշված կամեռայի ակտերը, կանգնում ես խաչմերուկին, 100 դրամ ես վերցնում, 10 հազար դրամի ակտ է գալիս»,-ասաց վարորդներից մեկը:

Tert.am-ի հարցին, թե որքան են մտադիր շարունակել բողոքը, վարորդները նշեցին՝ այնքան, մինչև գազը իջնի իր հին գնին:


11.15 


35, 37, 44, 75 համարի երթուղային տաքսիների վարորդները գործադուլ են անում Երևանում՝ ի նշան գազի թանկացման դեմ բողոքի: 

Նրանք փակել են Րաֆֆու փողոցը: Ոստիկանական ուժերը հորդորում են դուրս գալ ճանապարհից :

«Ես ուզում եմ իմ փողի համար պայքարել: Ես իմ թոռան փողի մասին չմտածեմ, դուք կմտածե՞ք»,-ասաց վարորդներից մեկը՝ պատասխանելով իրենց հետ բանակցելու եկած անձին, ով նշեց՝ փողոցում գոռալով հարցը չի լուծվի:

«Գնանք համապատասխան տեղ նստենք՝ լուծում տանք, տղե՛րք ջան»,- վարորդներին ասաց նրանց հետ բանակցելու եկած անձը, ինչին ի պատասխան վարորդները նշեցին, որ «էլ հավատ չկա մեր մեջ»։