Հումորիստներ Եվգենի Պետրոսյանն ու Միխայիլ Գալուստյանը դարձել են Պուտինի վստահված անձինք
Ռուսաստանի կենտրոնական ընտրական հանձնաժողովը գրանցել է 2018 թվականի նախագահական ընտրությունների համար գործող նախագահ Վլադիմիր Պուտինի վստահված անձանց երկրորդ խումբը, հայտնում է rusarminfo.ru-ն:
Պուտինի վստահված անձանց նոր ցանկում են հայտնվել գրող, հումորիստ Եվգենի Պետրոսյանը և հայտնի շոումեն, կատակերգու դերասան Միխայիլ Գալուստյանը:
Նոր վստահված անձանց թվում են նաև ռուս դիրիժորներ Յուրի Բաշմետը և Վալերի Գերգիևը, ռեժիսորներ Ֆյոդոր Բոնդարչուկը, Նիկիտա Միխալկովը և Անդրեյ Կոնչալովսկին, երգիչ Օլեգ Գազմանովը, պրոդյուսերներ Մաքսիմ Ֆադեևը, Իգոր Մատվիենկոն, երաժիշտ Նիկոլայ Ռաստորգուևը, մոդելյեր Վալենտին Յուդաշկինը:
Ավելի վաղ հաղորդվել է, որ օլիմպիական երկակի չեմպիոն, ռուսաստանաբնակ սուսերամարտուհի Յանա Եգորյանը և Russia Today-ի գլխավոր խմբագիր Մարգարիտա Սիմոնյանն ընդգրկվել են Վլադիմիր Պուտինի վստահված անձանց առաջին խմբում:
Այսպիսով՝ ՌԴ ԿԸՀ-ն նախագահական ընտրությունների համար գրանցել է գործող նախագահ Վլադիմիր Պուտինի վստահված անձանց առաջին խմբից 259, երկրորդ խմբից՝ 154 մարդու:
Ռուսաստանի նախագահական ընտրությունները տեղի են ունենալու մարտի 18-ին, նախընտրական արշավը պաշտոնապես մեկնարկել է 2017 թվականի դեկտեմբերի 18-ին:










