Տոնական միջոցառումներ, հուշանվերների ու պարգևների հանձնում Գյումրիում

17:22 • 28.01.18

Հայաստանի Հանրապետության Զինված ուժերի կազմավորման 26-րդ տարեդարձի առթիվ տոնական մի շարք միջոցառումներ տեղի ունեցան Գյումրիում տեղակայված զորամասերում:

Շիրակի մարզպետարանի և Գյումրու քաղաքապետարանի համատեղ նախաձեռնությամբ տոնական համերգով N զորամասի զինվորներին ողջունեցին Գյումրու ժողովրդական գործիքների պետական նվագախումբն ու գյումրեցի անհատ կատարողները: Հայոց բանակի կազմավորման տոնի առթիվ բոլորին ողջունեցին Շիրակի մարզպետն ու Գյումրու քաղաքապետը՝ Գյումրիում տեղակայված զորամասերի լավագույն զինվորներին հուշանվերներ ու պարգևներ հանձնելով:

Տոնի առթիվ պարգևներ էր պատրաստել նաև Երկրապահ կամավորական միությունը: Հայոց բանակին տոնի առթիվ շնորհավորական ուղերձ հնչեց նաև Գյումրիում տեղակայված 102-րդ ռազմաբազայի հրամանատարության անունից:

Տոնական բարձր տրամադրությունը զգացվում էր նաև զորամասի զինվորների շրջանում, ինչը ոչ միայն տոնական համերգի ու զորամաս ժամանած հյուրերի հետ էր կապված, այլ հենց հայկական բանակում ծառայելու փաստի: 

«Տրամադրությունն այսօր շատ բարձր է, ուրախ ենք, որ այսօր մեր տոնն է: Ընդհանուր առմամբ, տրամադրվածությունը հայկական բանակի նկատմամբ շատ բարձր է: Տրամադրությունը փոխվում է հենց բանակ մտնելու առաջին օրվանից, քանի որ քաղաքացիական կյանքում եղած շատ պատկերացումներ սխալ են. այս զորամասում ես դա եմ հասկացել: Կարծում եմ՝ ծառայությունից հետո տուն կվերադառնամ բոլորովին այլ մարդ դարձած: Արդեն այս զորամասում ձեռք եմ բերել ոչ միայն զինվորին վայել կեցվածք եւ պատրաստականություն, այլ նաեւ ընկերներ»,-«Արմենպրեսին»  փաստեցին ժամկետային ծառայողները: 


Օրվա խորհրդով պայմանավորված՝ զորամասի լավագույն զինվորները խրախուսվեցին: Բոլորին սպասում էր նաև տոնական ճաշ: