Հանրապետականի նախագահի թեկնածու Արմեն Սարգսյանն այսօր կհանդիպի ՀՀԿ խմբակցության հետ
Հայաստանի Հանրապետական կուսակցության՝ ՀՀ 4-րդ նախագահի թեկնածու Արմեն Սարգսյանն այսօր՝ ժամը 18-ին, հանդիպելու է ԱԺ «Հայաստանի Հանրապետական կուսակցություն» խմբակցության հետ: Նախաձեռնությունը եղել է Արմեն Սարգսյանինը՝ արված մոտ 2 օր առաջ:
Tert.am-ի հետ զրույցում այս տեղեկությունը հաստատած ԱԺ պատգամավոր Գալուստ Սահակյանը նաև հայտնեց. «Ես Արմեն Սարգսյանին շատ վաղուց եմ ճանաչում և շատ դրական եմ վերաբերվում: Կարծում եմ՝ ԱԺ-ն դրական որոշում կունենա, որովհետև որոշակի վերլուծություններ արվել են»:
«Ծառուկյան» խմբակցությունից Նաիրա Զոհրաբյանը ևս որևէ ժամկետի մասին տեղյակ չէր:
«Ելք» խմբակցությունից էլ Էդմոն Մարուքյանը հայտնեց, որ խմբակցության հետ հանդիպման օրը դեռ հայտնի չէ, քանի որ Նիկոլ Փաշինյանը և Արամ Սարգսյանը երկրում չեն:
«Պարոն Սարգսյանը մեզ հետ կապվել է, խոսել ենք: Ուղղակի, որ այստեղ չեն, դրա համար, երբ որ վերադառնան, հանդիպումը կկազմակերպենք: Բնականաբար, շատ հարցեր ունենք Արմեն Սարգսյանին, սկզբում կլսենք իրեն, հետո հարցեր կտանք»,- ասաց Մարուքյանը:
Tert.am-ին «Հայ Յեղափոխական Դաշնակցություն» խմբակցության քարտուղար Աղվան Վարդանյանը, պատասխանելով հարցին, թե երբ է նշանակված իրենց հանդիպումը, պատասխանեց, որ այդ մասին կհայտնեն:
Նշենք, որ համաձայն կարգի՝ այսուհետ նախագահի թեկնածուն պետք է հանդիպի ԱԺ խմբակցությունների հետ:
Հիշեցնենք՝ Արմեն Սարգսյանը՝ Մեծ Բրիտանիայում Հայաստանի դեսպանը, նախագահի թեկնածու լինելու առաջարկը ստանալուց հետո գործող նախագահ Սերժ Սարգսյանից ժամանակ էր խնդրել որոշում կայացնելու համար՝ շեշտելով, թե ցանկանում մինչ այդ հանդիպել թե՛ խորհրդարանական, և թե՛ արտախորհրդարանական ուժերին:










