Վրաստանից բերված անձին բերեք դատարան և ես կապացուցեմ, որ Հայաստան զենք չի բերվել, կամ ընդունեք, որ սա պատվեր է. Սամվել Բաբայանը՝ Վերաքննիչ դատարանում (տեսանյութ)

14:33 • 02.02.18

Վերաքննիչ դատարանում շարունակվում է Կենտրոն և Նորք Մարաշ վարչական շրջանների ընդհանուր իրավասության առաջին ատյանի դատարանի կողմից վեց տարի ազատազրկման դատապարտված Արցախի հերոս Սամվել Բաբայանի և «Իգլա»-ի գործով ևս երկուսի՝ Արմեն Պողոսյանի և Սանասար Գաբրիելյանի վերաքննիչ բողոքների քննությունը:

Մեղադրանքը Վերաքննիչ դատարանում պաշտպանում է դատախազ Արամ Արամյանը:

Դատական նիստի մեկնարկին Սամվել Բաբայանի պաշտպան Ավետիս Քալաշյանն ասաց, որ նախ պետք է  պարզել գործում առկա թղթադրամների մասով հարցերի պատասխանները: Ըստ նրա՝ պետք է պարզել, թե ներկոտված  թղթադրամները ե՞րբ և որտեղի՞ց են հափշտակվել, ապա անհրաժեշտ է հայտնել, թե այդ դեպքով քրեական գործ հարուցվե՞լ է, թե՞ ոչ, եթե այո՝ ապա ի՞նչ հատկանիշներով և նախաքննությամբ ինչ է պարզվել: Այս հարցի պատասխանը քրեական գործում առկա չէ, այսինքն` նախաքննության մարմինն իր տրամադրության տակ չի ունեցել որևէ հավաստի տվյալ , որ եվրոները կոնկրետ որ տեսակի հանցագործության կատարման եղանակով են հափշտակվել, այսինքն` սա նշանակում է, որ մենք չունենք Քրեական օրենսգրքի 190-րդ հոդվածով նախատեսված հանցակազմի առարկա, իսկ եթե դա չկա, մնացածի մասին խոսելն անիմաստ է»:

Քալաշյանի խոսքով՝ մեղադրանքում տեղ գտած այն ձևակերպումը, որ Սամվել Բաբայանն իմացել է, որ Ռուսաստանում բնակվող իր մտերիմ Տիգրան Հովհաննիսյանի  քննությամբ դեռևս չպարզված հանգամանքներում հնարավորություն ունի տրամադրելու ակնհայտ հանցավոր ճանապարհով ստացված հափշտակված բանկոմատային անվտանգության նպատակով օգտագործվող հատուկ ներկոտված եվրոյի թղթադրամների խմբաքանակ, գործով մեջբերված ոչ մի տվյալով հաստատված չէ:   

«Սամվել Բաբայանը նախաքննական և դատաքննական ցուցմունքներում տվել է մանրամասն ցուցմունք, պատասխանել է բոլոր հարցադրումներին, մասնավորապես հայտնել է, որ Մոսկվայում բնակվող իր ծանոթ Վասիլին իրեն գումար է պարտք եղել, նա էլ տեղեկացել է, որ իր պարտքից կարող է 5000 եվրո ուղարկել, բայց ներկոտված են: Սամվել Բաբայանն առաջարկել է այդ թղթադրամի նմուշն ուղարկել, որպեսզի հասկանան, թե ինչի մասին է խոսքը: Վալիսին ուղարկել է 20 և 50 եվրո չորս թղթադրամներ: Սամվել Բաբայանը կասկածել է, որ դրանք կարող են կեղծ լինել ուստի Կարեն Քոչարյանին տալով այդ  թղթադրամներից մեկը խնդրել այն տանել արտարժույթի փոխանակման կետ և ստուգել տալ դրա իսկությունը: Կարենը ստուգելուց հետո հայտնել է, որ դրամն իսկական է: Բաբայանն իմանալով, որ բանկերը կարող են դա փոխանակել և տասը տոկոս պահում անել, որոշել է փորձել, թե հնարավոր է այդ անհայտ ծագումով ներկը մաքրել, թե ոչ, որպեսզի քիչ տոկոս պահվի: Այդ նպատակով փնտրել է քիմիայի մասնագետ, ում տվել  այդ թղթադրամներից մեկը, ում հաջողվել է ներկից մաքրել: Համոզվելով,  որ կեղծ չեն թղթադրամները, Մոսկվայում բնակվող իր մտերիմին խնդրել է, որպեսզի այդ գումարը ուղարկի իրեն: Սամվել Բաբայանի ցուցմունքով նշված հանգամանքները հերքված չեն:

Սամվել Բաբայանը տվել է անուններ՝ Տիգրան, Վասիլի, որոնք չեն հարցաքննվել, իսկ միգուցե հարցաքննվելու դեպքում կարող է հաստատեն Բաբայանի ցուցմունքները, անձը նշել է այն անձանց անունները, որոնք կարող են հաստատել,մեղադրանքի կողմի պարտականությունն է հերքել կամ ապացուցել»,-ասաց Քալաշյանը:

Սամվել Բաբայանն էլ ասաց, որ նախ ինքը դատարանում է ոչ պաշտպանվելու համար, որովհետև ոչինչ չի արել, որ պաշտպանվի:

Ինչ վերաբերում է  Քրեական օրենսգրքի 38-235-րդ հոդվածի 2-րդ մասով իրեն առաջադրված մեղադրանքին Սամվել Բաբայանն ասաց, որ ամբողջ ձայնագրությունը ցույց է տալիս, որ գործով անցնող մյուս անձինք մեկ տարի խոսել են զենքի մասին, իսկ ինքը այդ թեմայում չի եղել:

«Երբ մարդը զանգում է ինձ բանավոր բացատրում և ասում, որ ուզում է հասկանալ այդ խողովակը զենք է, թե ոչ, ասել եմ՝ նկարի ուղարկի, ես որևէ իմ արտահանություններից չեմ հրաժարվել: Նկարը տեսնելուց հետո ասել եմ, որ առանց մարտկոցի դա ընդամենը խողովակ է, կոմպլեկտ չէ:  Կոմպլեկտ բառն եմ օգտագործել, ձայնագրության մեջից բառերը հանել են: Ես վստահ եմ, Հայաստանում ում տասը ամիս գաղտնալսեն, հաստատ կդատեն, կոնտեքստից կտրում են բառերը ու սարքում»,-ասաց Բաբայանը:

Անդրադառնալով Հրաչ Մայիլյանին, ով Բաբայանի գործով առանձնացված մասով ամբաստանյալ է, Սամվել Բաբայանն ասաց, որ նրան ավելի ծանր մեղադրանք է առաջադրվել, իսկ նա ազատության մեջ է, իսկ ինքն ավելի թեթև մեղադրանքով դատապարտվել է ազատազրկման.«Այդ մարդում բերում են դատարան, բայց պայմանով, որ չխոսի: Ձայնագրության մեջ ես հարցնում եմ` եթե խողովակի գումարը քեզ տային, ապա դու այդ մասին կհայտնեի՞ր պետական անվտանգությանը, ասում է՝ ոչ: Հիմա այդ մասն ինչու՞ է հանվել ձայնագրությունից: Այն, որ ինքն ազատության մեջ է, իսկ ես ոչ, դա ամեն ինչի մասին խոսում է: Բացի այդ, Մայիլյանը խոսում է ինչ-որ անձի մասին(Ռոբերտ Աղվանյան, խմբ.), ում Վրաստանից տեղափոխել են: Հիմա ես միջնորդում եմ, որ Վրաստանից տեղափոխվածին բերեք դատարան` թեկուզ վկայի կարգավիճակով, այստեղ հարց ուղղենք՝ այդ մարդը Վրաստանի տարածքից ինչ-որ զինամթերք տեղափոխե՞լ է ՀՀ տարածք, թե՞ չէ: Եթե սա չեք անում, ուրեմն պատվեր է, ուրեմն պատվերը հաստատում եք, կամ պիտի անեք, կամ պիտի ընդունեք, որ պատվեր է: Եթե այդ անձին բերեք, ես կապացուցեմ, որ Վրաստանից Հաաստան հրթիռ չի բերվել»:

Անդրադառնալով փողերի լվացման մեղադրանքին, Բաբայանն ասաց, որ թող մեղադրող դատախազն իրեն բացատրի, թե ի՞նչ է արել ինքը: Սամվել Բաբայանն ասաց, որ ինքը հանցագործություն չի կատարել,և խնդրեց, որ դատարանը գործ ուղարկի նախաքննության և այն մարդկանց ում մասին խոսվել է, հրավիրեն դատարան։ Դատարան ասաց, որ միջնորդություն ներկայացնելու համար դատարանը Բաբայանին ժամանակ կտա:

Հիշեցնենք, որ դատապարտյալ Սամվել Բաբայանը,առաջին ատյանի դատարանի կողմից մեղավոր է ճանաչվել Քրեական օրենսգրքի 38-235-րդ հոդվածի 2-րդ մասի և 190-րդ հոդվածի 1-ին մասի հատկանիշներով և դատապարտվել ազատազրկման 6 տարի ժամկետով: Նա պահանջում է արդարացնել իրեն՝ արդարացման դատական ակտ կայացնել հանցակազմի բացակայության պատճառաբանությամբ:

Դատապարտյալ Սանասար Գաբրիելյանը, ով մեղավոր է ճանաչվել ՀՀ ՔՕ-ի 235-րդ հոդվածի 2-րդ մասի հատկանիշներով և դատապարտվել 3 տարի ազատազրկման, պահանջում է իրեն անպարտ ճանաչել:

2 տարվա ազատազրկման դատապարտված Արմեն Պողոսյանը պահանջում է բեկանել առաջին ատյանի դատարանի կայացրած դատավճիռն ու կայացնել արդարացման որոշում:

Նշենք, որ գործով անցնում էին ևս չորս ամբաստանյալ: Առաջին ատյանի դատարանը Կարեն Քոչարյանին, Անդրանիկ Քոչարյանին, Ժորա Զաքարյանին և Դավիթ Հարությունյանին մեղավոր էր ճանաչել ՀՀ ՔՕ-ի 38-190-րդ հոդվածի 1-ին մասի հատկանիշներով նախատեսված արարք կատարելու համար: Նրանց պատիժը պայմանականորեն չի կիրառվի: