Ամերիկացի զույգը վիճակախաղով շահել է հազար անգամ ավելի մեծ գումար, քան ակնկալում էր

15:07 • 02.02.18

ԱՄՆ-ում վիճակախաղով գումար շահած ամուսիններն անսպասելիորեն ստացել են սպասվածից հազար անգամ ավելի մեծ գումար՝ 1 միլիոն դոլար, գրում է UPI պորտալը:

Սինդի Ուլին վերջին տարիներին մշտապես շաբաթական երկու անգամ Hoosier վիճակախաղի տոմս է գնել: Տունը մաքրելիս նա գտել է սեպտեմբերի 23-ի տոմսը և պարզել, որ դրանով իրենք շահել են 1000 ԱՄՆ դոլար:

Կինը զգուշացրել է ամուսնուն՝ Սթիվին, որ իրենք պետք է գնան գրասենյակ և վերցնեն շահումը: Երբ գրասենյակի աշխատակիցները նրանց են հանձնել շահած գումարի անդորրագիրը, զույգը նկատել է, որ զրոների թիվն իրենց սպասածից երեքով ավելի է:


Hoosier-ի ներկայացուցիչները հաստատել են, որ նրանց շահումը կազմում է մեկ մլն դոլար. նրանց գնած տոմսում համընկել են պահանջվող 6 թվերից 5-ը:

Շոկի ենթարկված զույգը հայտնել է, որ դեռ չի որոշել, թե ինչպես պետք է ծախսի նման խոշոր շահումը: