Առանց իրազեկման հունվարի 8-ից սկսել են տուգանել տրանզիտ համարանիշով մեքենաների վարորդներին, մարդ կա արդեն 3.5 մլն դրամի տուգանք ունի. Մ. Շահնազարյան (տեսանյութ)
Ավտովարորդների պաշտպանության լիգայի ներկայացուցիչները բողոքում են, որ առանց պատշաճ հանրային իրազեկման 2018 թ.-ի հունվարի 8-ից ՀՀ-ում սկսել են տուգանվել մաքսային տարանցիկ ժամանակավոր հաշվառման համարանիշներով մեքենաների վարորդները, այսպես կոչված՝ տրանզիտ համարներով մեքենաները:
Լիգայի իրավաբանական խմբի ղեկավար Մհեր Շահնազարյանի տեղեկացմամբ՝ հունվարի 8-ից մինչ այժմ տրանզիտ համարանիշով մեքենայի վարորդներից մեկն արդեն 3.5 մլն դրամի չափով տուգանվել է:
«Համամիտ ենք, որ բոլոր վարորդները պետք է տուգանվեն խախտումներ անելու համար, բայց խնդիրը սոցիալական կողմ ունի: Եթե զանգվածային լրատվության միջոցներով հայտարարում ենք, որ օտարերկրյա պետհամարանիշով մեքենաների վարորդները կենթարկվեն պատասխանատվության, ապա նույնը պետք է հայտարարվեր նաև ներմուծվող տարանցիկ համարանիշերով մեքենաների վարորդների համար: Հանրային իրազեկման խնդիրն է այստեղ, պետք է ասեին, որ հունվարի 8-ից հետո կիրառվելու է այս իրավանորմը»,- ասաց իրավաբանը:
Հիշեցնենք, որ ՀՀ-ում գործում է տեսանկարահանող և լուսանկարահանող սարքերի միջոցով հայտնաբերված խախտումների վարչական վարույթներով առանձնահատկությունների մասին օրենքում 2015 թ. դեկտեմբերին կատարվել է փոփոխություն և լրացում: Ավելացվել է 7.1 հոդվածը, համաձայն որի՝ ՃԵԿ խախտումների համար պատասխանատվություն պետք է կրեն նաև մաքսային տարանցիկ ժամանակավոր հաշվառման համարանիշներով մեքենաների վարորդները, ինչպես նաև օտարերկրյա պետություններում հաշվառված ավտոմեքենայի վարորդները:
«Երկու տարուց ավելի՝ 2016-2017 թթ.-ին այդ իրավանորմը չգործեց, քնել էր, հանկարծ 2018 թ.-ի հունվարի 8-ից սկսել են կիրառվել մաքսային տարանցիկ ժամանակավոր հաշվառման համարանիշներով մեքենաների վարորդների, ինչպես նաև օտարերկրյա պետություններում հաշվառված ավտոմեքենայի վարորդների նկատմամբ»,- նշեց Մհեր Շահնազարյանը:
Մանրամասները՝ տեսանյութում:










