ԵՊՀ ռոմանագերմանական ֆակուլտետի փոխդեկանը հերքում է, որ իր մասնակցությամբ ծեծկռտուքի պատճառը եղել է ուսանողուհուն անպարկեշտ առաջարկ անելը
ԵՊՀ ռոմանագերմանական ֆակուլտետի փոխդեկան Գևորգ Բարսեղյանը չցանկացավ որևէ մեկնաբանություն տալ փետրվարի 16-ին իր աշխատասենյակում տեղի ունեցած ծեծկռտուքի միջադեպի վերաբերյալ:
Tert.am-ի ճշտող հարցին, թե արդյոք ճիշտ են մամուլում շրջանառվող լուրերը, որ ծեծկռտուքի պատճառն իր կողմից ուսանողուհուն արված անպարկեշտ առաջարկն է եղել, Բարսեղյանն արձագանքեց, որ այդպիսի բան չկա և որ դրանք հերյուրանքներ են:
Հիշեցնենք, որ ինչպես տեղեկացնում էր Shamshyan.com–ը, նշված բուհի ռոմանագերմանական բանասիրության ֆակուլտետի փոխդեկան Գևորգ Բարսեղյանը իր աշխատասենյակում ծեծի է ենթարկվել:
Նշենք նաև, որ Tert.am–ին ՀՀ ոստիկանության լրատվության և հասարակայնության հետ կապերի վարչությունից հայտնել են, որ Ոստիկանություն հաղորդում է ստացվել ԵՊՀ Ռոմանագերմանական ֆակուլտետում տեղի ունեցած միջադեպի մասին:










