«ՎՏԲ-Հայաստան» բանկից հափշտակվել է շուրջ 8,5 մլն դրամի տարբեր արտարժույթի գումար. ավազակային հարձակման դեպքով քրգործ է հարուցվել. ՔԿ (տեսանյութ, լուսանկարներ)

17:00 • 19.02.18

19.10 

ՀՀ քննչական կոմիտեի ԵՔՔՎ Արաբկիր վարչական շրջանի քննչական բաժնում հարուցվել է քրեական գործ՝ «ՎՏԲ-Հայաստան Բանկ» ՓԲԸ-ի աշխատակցի նկատմամբ վտանգավոր բռնություն գործադրելու սպառնալիքով առանձնապես խոշոր չափերի հափշտակություն կատարելու դեպքի առթիվ։ 

Այս մասին հայտնում են Քննչական կոմիտե լրատվական ծառայությունից։ 

Նախնական տվյալներով՝ փետրվարի 19-ին՝ ժամը 15։35-ի սահմաններում, զինված երկու անձ մուտք է գործել «ՎՏԲ-Հայաստան Բանկ» ՓԲԸ-ի թիվ 4 մասնաճյուղ և աշխատակիցների կյանքի և առողջության  համար վտանգավոր բռնություն գործադրելու սպառնալիքով՝ ավազակային հարձակմամբ, հափշտակել առանձնապես խոշոր չափի գումար։  Պատճառված վնասի չափը հստակեցվում է. ըստ նախնական հաշվարկների՝ հափշտակվել է շուրջ 8,5 մլն դրամի տարբեր արտարժույթի գումար։ 

Դեպի առթիվ քրեական գործ է հարուցվել ՀՀ քրեական օրենսգրքի 175-րդ հոդվածի 3-րդ մասի 1-ին կետով, ստեղծվել քննչական խումբ։ Ձեռնարկվում են անհրաժեշտ քննչական և օպերատիվ-որոնողական միջոցառումներ՝ ենթադրյալ հանցագործություն կատարած անձանց ինքնությունը պարզելու և հայտնաբերելու ուղղությամբ։ 

Կատարվել է դեպքի վայրի զննություն, առգրավվել մասնաճյուղի տարածքում գործող տեսանկարահանող սարքերի տեսագրությունները։ 

ՔԿ-ից հայտնում են, որ նախաքննության արդյունքների մասին տեղեկություն կտրամադրեն ավելի ուշ։ 


18.03 

«ՎՏԲ-Հայաստան» բանկի Բաղրամյան մասնաճյուղի կառավարիչը հորդորեց տեղում աշխատող լրագրողներին այլևս նկարահանում չիրականացնել, քանի որ որևէ նորություն չկա: Դիտարկմանը, թե վարկած կա, որ բանկի աշխատակիցներն են կազմակերպել բանկի վրա հարձակումը, բանկի կառավարիչն ասաց, թե դա զուտ վարկած է:

Ինչ վերաբերում է ականատեսների պատմածներին, «ՎՏԲ-Հայաստան» բանկի Բաղրամյան մասնաճյուղի կառավարիչն ասաց.«Որևէ մանրամասնություններ դեռևս չկան, որևէ բան պարզաբանված չէ, հետևաբար, չեմ կարող որևէ բան ասել»:


18.00

Ոստիկանության Երևան քաղաքի վարչության պետի օպերատիվ գծով տեղակալ Արտակ Պողոսյան լրագրողներին ասել է, որ այսօր՝ 15:30-ի սահմաններում, երկու մարդ «ՎՏԲ-Հայաստան» բանկի Բաղրամյան մասնաճյուղի բռնություն գործադրելու սպառնալիքով ներխուժել են բանկ:  Նա նաև տեղեկացրել է, որ տուժածներ չկան, թեև  հարձակման ժամանակ ներսում մարդիկ են եղել:

Արտակ Պողոսյանը հափշտակած գումարի չափի մասին հստակ տեղեկություններ չտրամադրեց՝ պատճառաբանելով, թե այս պահին բանկի աշխատակիցներն այդ հարցն են ուսումնասիրում:

«Քաղաքացիներից գումար չեն հափշտակել, միայն բանկի գումարն է եղել»,- ասաց  նա՝ հավելելով, որ բանկի վրա հարձակում գործած անձինք դիմել են փախուստի և դեռևս չեն հայտնաբերվել:

Ըստ բանկի աշխատակիցների նախնական ցուցմունքների՝ հարձակում  կատարողները զինված են: Ինչ վերաբերում է բանկի բնականոն աշխատանքի վերադառնալուն, Արտակ Պողոսյանը նշեց, որ Ոստիկանության և քննչական մարմինների  աշխատանքի ավարտից հետո, բանկը կշարունակի աշխատանքը:



17.33

Tert.am-ի տեղեկություններով զինված անձինք բանկից մոտ 8 միլիոն դրամ են հափշտակել։

Տուժածներ չկան։

 
17.27

Այս պահին «ՎՏԲ-Հայաստան» բանկի Բաղրամյան մասնաճյուղի մոտ աշխատում են Քննչական կոմիտեի աշխատակիցները: Փաստի առիթով նյութեր են պատրաստվում:


––––––––––


Այսօր՝ ժամը 16.00-ին, Ոստիկանությունում ահազանգ է ստացվել, որ «ՎՏԲ–Հայաստան» բանկի Բաղրամյան  մասնաճյուղի (գտնվում է Բաղրամյան 56 հասցեում) վրա զինված հարձակում է տեղի ունեցել։

Ոստիկանության օպերատիվ խումբը տեղում է, կատարում են համապատասխան գործողություններ, Tert.am-ին տեղեկացրեց ՀՀ ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը: 

Հարձակում գործած անձինք երկուսն են։


Մանրամասների մասին լրացուցիչ կտեղեկացվի։