Հայ-վրացական սահմանին հայկական կողմը պահանջում է մաքսազերծել նաև արտահանման ենթակա մրգի ու բանջարեղենի դատարկ տարաները. ջավախահայ

17:05 • 05.06.18

Վրաստանից եկող մեքենաները, որոնք Հայաստան են գալիս հայկական միրգ ու բանջարեղեն տանելու դեպի Վրաստան, խնդիրներ են ունենում մաքսազերծման կետերի հետ, քանի որ սահմանային անցակետում պահանջում են մաքսազերծել նաև դատարկ արկղերը: Tert.am-ի հետ զրույցում այս մասին ահազանգեց ջավախահայ Վարդան Դանիելյանը: Նրա խոսքով՝ տարաները դատարկ և մի քանի անգամ օգտագործված են ու նախատեսված են զուտ գնված ապրանքն արտահանելու համար:

«Դրանք օգտագործված արկղեր են, որոնք նախատեսված են զուտ ապրանքը տեղափոխելու համար, քանի որ արկղերը յուրաքանչյուրն ընտրում է իր մեքենայի հետ համեմատելով: Նայեք՝ մարդը գալիս է ապրանքը վաճառելու, գյուղացի տղա է, հատուկ տարաներ չունի, որով ես կարող եմ ապրանքը տանել, ինչ-որ տեղ էլ չկա, որ մարդիկ գնան, հատուկ արկղեր գնեն: Օրինակ՝ հիմա իմ մեքենան 4 տոննա կարող է տանել, եթե ես 4 տոննայից ավել տարողություն ունեցող արկղեր բերեմ, կարող են ինձ ասել, որ բիզնեսի համար եմ բերում, բայց 4 տոննայի համար է, ու չեն թողնում առանց մաքսազերծման»,- ասաց նա:

Ըստ Վարդան Դանիելյանի՝ նման խնդիրների սկսել են բախվել նախորդ տարվա սեպտեմբերից, սակայն նա պատմեց, որ մի պահ այս գործելաոճը դադարեցվել է, այժմ կրկին մաքսազերծման կետերում պահանջում են մաքսազերծել դատարկ տարաները: Նա նշեց, որ, եթե նման կարգավորում նույնիսկ օրենքով է սահմանված, միևնույն է, այն իսկապես խանգարում է արտահանմանը:

«Կարող եմ վստահեցնել, որ Ջավախքում այս խնդիրը բոլորին հուզում է, Թբիլիսիի կողմի մարդկանց էլ է անհանգստացնում, բայց հիմնականում Ջավախքի հայ ընտանիքներ են, որոնք ցանկանում են հայկական միրգ ու բանջարեղեն տանել իրենց տարածք ու վաճառել»,- ընդգծեց Վարդան Դանիելյանը:

Վերջինս հույս ունի, որ ժամանակավոր, համաձայնության կառավարությունն իր ուշադրությունը կսևեռի խնդրի վրա ՝փորձելով կարգավորում տալ, որը չի վնասի ո՛չ պետությանը, ո՛չ հայ արտահանողին:

Tert.am-ի խնդիրը ներկայացրել է նաև Պետական եկամուտներ կոմիտեին և պատասխանը կներկայացնի հաջորդիվ:

 

ՀեղինակԱնի Օհանյան