Տաջիկստանում ընդհատակյա ահաբեկչական խմբավորում է չեզոքացվել, որոնք մտադիր էին հարձակում իրականացնել ռուսական ռազմաբազայի վրա
Տաջիկստանում չեզոքացվել է երկրում արգելված «Իսլամական վերածննդի կուսակցության» ընդհատակյա ահաբեկչական խմբավորումը: Այս մասին «РИА Новости»-ին տեղեկացրել են հանրապետության ազգային անվտանգության պետական կոմիտեի հասարակայնության հետ կապերի կենտրոնում:
Աղբյուրը մանրամասնում է, որ փետրվարին իրականացված հատուկ գործողության արդյունքում 14 մարդ է ձերբակալվել: Նրանք պլանավորել են խոշոր ահաբեկչություններ իրականացնել մարտին՝ Նովրուզի տոնակատարությունների ժամանակ: Բացի այդ, ահաբեկիչները հարձակում են մշակել Դուշանբեում տեղակայված 201-րդ ռուսական ռազմաբազայի վրա:
Նշվում է, որ հատուկ գործողության մանրամասները հայտնի են դարձել դատից հետո: Պարզվել է, որ ահաբեկիչները հատուկ նախապատրաստում են անցել Աֆղանստանի Ջելալաբադ քաղաքում, այնուհետև ռազմական գործողությունների մասնակցել «Իսլամական պետություն» ահաբեկչական խմբավորման ստորաբաժանումների կազմում:
Բոլոր ձերբակալվածները մեղավոր են ճանաչվել վարձկալության, ծայրահեղական կազմակերպության գործունեությունը կազմակերպելու, պետական սահմանն ապօրինի հատելու, ինչպես նաև՝ ահաբեկչության համար: Դուշանբեի դատարանը 7-26 տարի ժամկետով ազատազրկման է դատապարտել խմբավորման հիմնադիրներին ու անդամներին:










