Խնդիրներ ունեցել ենք, լուծում ենք. «Սանիթեք» ընկերության հիմնադիրը հանդիպեց իրենց գործունեության դեմ բողոքի ակցիայի մասնակիցների հետ (տեսանյութ)

12:03 • 01.08.18

Երևանի ավագանու «Ելք» խմբակցությունն այսօր բողոքի ակցիա անցկացրեց «Սանիթեք» ընկերության գործունեության դեմ։ Խմբակցության անդամները պնդում էին, որ աղբահանման բնական ընթացքը ընկերությունը չի ապահովում:

Խմբակցության ղեկավար Դավիթ Խաժակյանն ասաց, որ գրեթե ամենուր աղբահանության իրավիճակն անմխիթար է. «Աղբակույտերն ու գարշահոտությունը համատարած բնույթ են կրում»,-ասաց նա:

Խմբակցության անդամ Թեհմինա Վարդանյանը իր ֆեյսբուքյան էջում գրել էր, որ 10 օր առաջ այցելել է ընկերություն, որտեղ խոստացել են, որ մեկ-երկու օրվա ընթացքում վիճակը էապես կկարգավորվի և աղբահանման բնականոն ընթացքը կապահովվի, բայց խնդիրը չի լուծվել:

«Ելք» խմբակցության անդամները «Սանիթեք» ընկերության դիմաց հնչեցրեցին իրենց պահանջները, որոնք պետք է կատարվեն օգոստոսի երկուսից  յոթնօրյա  ժամկետում:

«Երևան քաղաքում դատարկել բոլոր աղբամանները, մաքրել բոլոր հարթակները, Երևան քաղաքի բազմաբնակարան շենքերի, բակերի, փողոցների բոլոր աղբակույտերը: Միաժամանակ, այս պահանջը ներառում է նաև աղբահանման կանոնավոր աշխատանքը վերականգնելը և պայմանագրի տարածքում` Երևանի արևելքում, արևմուտքում մաքրության պահպանման աստիճանը դ կարգից ա կարգի հասցնելը:

Պահանջի չկատարման դեպքում Երևանի ավագանու «Ելք» խմբակցությունը դիմելու է Երևանի քաղաքապետարան՝  ծառայությունների մատուցման պայմանագիրը լուծարելու նպատակով»,-նշեց «Ելք»խմբակացության անդամ Անի Սամսոնյանը:

Պահանջները գրավոր փոխանցվեցին նաև ընկերության տնօրենին, ով եկել էր ակցիայի մասնակիցների հետ զրուցելու համար: «Սանիթեք» ընկերության հիմնադիր, սեփականատեր, ղեկավար Նիկոլաս Թավիլը նշեց, որ խնդիրներ ունեն, չեն փախչում պատասխանատվությունից, ունեն սխալներ, անցած տարի ևս ունեցել են սխալներ, բայց աշխատում են դրանք շտկելու համար: Տնօրենն ընդգծեց, որ խնդիրների մի մասը իրենց հետ կապված չէ:

Նիկոլաս Թավիլն ասաց, որ երեկ մամուլի ասուլիսի ժամանակ մանրամասն ներկայացրել է  խնդիրները:

Հիշեցնենք, որ «Սանիթեք» ընկերության հիմնադիր, սեփականատեր, ղեկավար Նիկոլաս Թավիլը երեկ ներողություն էր խնդրել իրավիճակի համար հույս հայտնեց, որ որոշ մարդիկ կդադարեն օգտագործել «Սանիթեքի» գործոնը քաղաքական դիվիդենտներ շահելու հարցում և ներկայացրել այն պատճառները, թե ինչու է մայրաքաղաքում աղբը հավաքելու խնդիր առաջացել:

«Շատերն ասում են, թե «Սանիթեքը» ստեղծում է իր աղբավայրերը, մասնավորապես՝ Աջափնյակում: «Սանիթեքն» ինքն իրենով աղբանոց կամ աղբավայր չի ստեղծել: Մենք համագործակցում ենք պետական մարմինների հետ, օգտագործում ենք այն աղբավայրերը, որոնք արդեն ծառայել են որպես աղբավայր: Հիմա խնդիրների մասին. դրանք առաջացել են 2 շաբաթ առաջ, և հիմա աստիճանաբար լուծում ենք դրանք: Չեմ կարող ասել, որ 100 տոկոսով լուծել ենք, բայց կարգավորում ենք: Մեքենաների հետ կապված խնդիր ենք ունեցել, ունեցել ենք խնդիրներ պահեստամասերի հետ կապված:

Մեքենաները, որոնք օգտագործվում են Երևանում, եվրոպական ստանդարտներին են համապատասխանում, դրանք զգայուն մեխանիզմներ են: Մենք ունենք նոր մեքենաներ, պատվիրել ենք նորերը, որոնք շուտով կստանանք: Մենք ներդրում ենք 500-600 հազար դոլար, որ կարողանանք նոր մեքենաներ բերել: Բանակցում ենք նաև մեքենաները թարմացնելու ուղղությամբ:

Շուտով կունենանք նաև նոր աղբամաններ: Ո՛չ լրագրողները, ո՛չ բնակիչները չեն պատկերացնում, թե օրվա ընթացքում ինչքան գումար ենք կորցնում վնասված աղբամանների պատճառով: 600 հազար դոլարի վնաս ենք ունեցել դրանց պատճառով: Այս պահին 8000-ից ավելի աղբամաններ կան, բայց նորերն ենք պատվիրել, աշխատում ենք որոշ մասը վերանորոգել ու նորերով թարմացնել»,- մանրամասնել էր նա: