ՆԱՏՕ-ն պաշտպանել է ՌԴ-ի դեմ նոր պատժամիջոցների մասին ԱՄՆ-ի որոշումը

14:57 • 09.08.18

ՆԱՏՕ-ն պաշտպանել է Ռուսաստանի նկատմամբ Սոլսբերիում միջադեպի առնչությամբ նոր սահմանափակող միջոցների մասին ԱՄՆ-ի որոշումը՝ պատժամիջոցների ռեժիմը համարելով ՌԴ-ի նկատմամբ ճնշում գործադրելու կարևոր գործիք: Այդ մասին «ՌԻԱ Նովոստի»-ին հայտնել է Հյուսիսատլանտյան դաշինքի գլխավոր գրասենյակի պաշտոնյան, որը չի ցանկացել հայտնել անունը:

«Պատժամիջոցները կարևոր միջոց են միջազգային հանրության համար պահպանելու Ռուսաստանի նկատմամբ ճնշումը՝ նրա կողմից իր պարտավորություններին հետևելու համար: Սոլսբերիում հարձակման վերաբերյալ ՆԱՏՕ-ի դիրքորոշումը հստակ ներկայացված է դաշինքի բրյուսելյան գագաթնաժողովի հռչակագրում»,- ասել է գործակալության զրուցակիցը՝ մեկնաբանելով ԱՄՆ-ի նոր պատժամիջոցները:

ԱՄՆ վարչակազմը չորեքշաբթի հայտարարել է Ռուսաստանի դեմ նոր պատժամիջոցների մասին՝ բրիտանական Սոլսբերի քաղաքում քիմիական զենք կիրառելու համար: NBC հեռուստաալիքի աղբյուրների տվյալներով՝ պատժամիջոցների առաջին փաթեթը ենթադրում է ՌԴ էլեկտրոնային սարքերի և երկակի օգտագործման համար նախատեսված պարագաների արտահանման արգելք, երկրորդ փաթեթը կարող է ներառել դիվանագիտական հարաբերությունների մակարդակի նվազեցում, ԱՄՆ «Աերոֆլոտ»-ի թռիչքների արգելք և ամերիկյան արտահանման գրեթե ամբողջական դադարեցում: Ռուսաստանը կարող է խուսափել պատժամիջոցների երկրորդ ալիքից, եթե երաշխավորի ապագայում քիմիական զենքի չկիրառումը:

Բացի այդ, անցած շաբաթ ամերիկյան Կոնգրեսում Ռուսաստանի դեմ նոր պատժամիջոցների վերաբերյալ օրինագիծ է ներկայացվել, որով ենթադրվում են պատժամիջոցներ ՌԴ նոր պետական պարտքի և պետական բանկերի դեմ: