Ամբողջ մարզը տուժել է ոչ միայն կարկուտից, այլ նաև ուժգին քամուց․ Արմավիրի մարզպետ
Մեր գյուղում այսօր երեկոյան տեղացած ուժեղ կարկուտի հետևանքով գյուղացիները կորցրել են մրգի ողջ բերքը, բանջարեղենը։
Այս մասին Tert.am-ին դիմելով ասաց Արմավիրի մարզի Մրգաշատ գյուղի բնակչուհի Շողիկ Պետրոսյանը։
«Միայն մենք 3 տոննա խաղող ենք կորցրել, վազերը, հասած խաղողը գետնին են հավասարվել։ Կարկուտը չէր դադարում. 19։45-ից սկսել է ու 20 րոպե տեղացել։ Չգիտենք՝ ինչ ենք անելու, վարկեր ունենք, ողջ եկամուտը կորավ։ Սրանով ձմեռն էլ էինք ապրելու։ Էլ չասեմ՝ բանջարեղենն էլ ամբողջովին վնասվել է։ 500 հազար դրամից ավել տուժել ենք»,- շեշտեց նա։
Բնակչուհին ասաց, որ գյուղացիներն արդեն դիմել են գյուղապետարան, որպեսզի գրանցեն վնասի չափը։
Մրգաշատի գյուղապետ Մանվել Դանիելյանը հաստատեց, որ գյուղի մեծ թվով տնտեսություններ տուժել են։
«Արդեն դիմել ենք մարզպետարան, առավոտյան կփորձենք գույքագրել վնասի ողջ չափը։ Խոշոր վնաս կլինի, ողջ գյուղն է տուժել։ Պատկան մարմիները տեղեկացված են»,- մանրամասնեց նա։
Գյուղապետն ասաց, որ չի կարող ասել՝ հարակից գյուղերը կարկուտի հետևանքով տուժել են թե ոչ։
Արմավիրի մարզպետ Գագիկ Միրիջանյանը, ավելի ուշ արձագանքելով մեր հրապարակմանը, նշեց․
«Առաջին իսկ վայրկյանից ինձ զեկուցել են՝ ամբողջ մարզը տուժել է ոչ միայն կարկուտից, այլ նաև ուժգին քամուց։ Ես առավոտյան առավել տուժած համայնքներ կայցելեմ՝ խնդրին տեղում ծանոթանալու»։










