Մեքսիկայի նորընտիր նախագահը կչեղարկի պաշտոնյաների համար բյուջեի հաշվին բուժապահովագրությունը
Մեքսիկայի նորընտիր նախագահ Անդրես Մանուել Լոպես Օբրադորը խոսք է տվել չեղարկել պետական պաշտոնյաների համար բյուջեի հաշվին բժշկական ապահովագրությունը:
Ինչպես նշում է ria.ru-ն, Լոպես Օբրադորն ընդգծել է, որ դա անում է պետական միջոցները խնայելու համար:
«Պետության բարձրագույն չինովնիկների համար չի լինի բժշկական ապահովագրություն, մասնավոր հիվանդանոցներում բուժում ստանալու հնարավորություն: Մենք այդ մասին ասել ենք քարոզարշավի ժամանակ: Մենք տնտեսելու ենք, և հուսով եմ, որ իշխանության մյուս ճյուղերն էլ նույնը կանեն»,- հայտարարել է նորընտիր նախագահը:
Ավելի վաղ քաղաքական գործիչը խոստացել էր, որ պաշտոնը ստանձնելուց հետո ոչ մի պետաշխատող չի կարողանա նախագահից ավելի բարձր աշխատավարձ ստանալ: Լոպես Օբրադորը նախագահական աշխատավարձը կկիսի ու պատրաստվում է կրճատել բարձրաստիճան պաշտոնյաների աշխատավարձերը, որպեսզի կարողանա բարձրացնել կարիքավոր խավի աշխատավարձերը:
Սակայն Լոպես Օբրադորն այսքանով չի սահմանափակվել: Նա հրաժարվել է մայրաքաղաք Մեխիկոյում գտնվող շքեղ նախագահական նստավայրից՝ հայտարարելով, որ այն կվերածի ժողովրդի համար նախատեսված մշակութային կենտրոնի:
Բացի այդ, նա հայտարարել է նախագահական օդանավը վաճառելու մտադրության մասին, արգելել է բարձրաստիճան պաշտոնյաներին ճամփորդել մասնավոր օդանավերով և ուղղաթիռներով:
«Այս ամենի վերջը դրվելու է: Մենք չենք կարող ունենալ հարուստ կառավարություն ու աղքատ բնակչություն»,-ասել է նախագահը:
Հիշեցնենք, որ Լոպես Օբրադորը նախագահի պաշտոնը կստանձնի դեկտեմբերի 1-ին:










