ՔՊ-ի ապահարզանը «Ելք» դաշինքի ուժերից ճիշտ էր. Ազատ Արշակյան (տեսանյութ)
ԳԽ պատգամավոր Ազատ Արշակյանը կարծում է, որ Նիկոլ Փաշինյանը «Ծառուկյան դաշինք», ՀՅԴ խմբակցություններին ևս չվստահելու հիմք ունի, քանի որ այդ ուժերը ժամանակին իշխանության «փայատերեր» են եղել:
Ազատ Արշակյանը Tert.am-ի հետ զրույցում ընդգծեց, որ անվստահությունն է պատճառը, որ Նիկոլ Փաշինյանը պարբերաբար հիշեցնում է՝ կոալիցիա չկա, իրեն ժողովուրդն է ընտրել:
«Եթե Հայաստանում ազատ, արդար, թափանցիկ ընտրություններ անցկացվեն՝ չի կարող «Ծառուկյան» դաշինք լինել ՀՀ-ում, նա չի կարող մասնակցել ընտրություններին՝ լինելով «Եդինայա Ռոսիայի» դաշնակիցը. այստեղ չպետք է իշխանություն ունենա, պիտի լինի «Գրիբոյեդովական ակումբ»,- շեշտեց նա:
Ազատ Արշակյանն ասաց, որ հեղափոխության արդյունքներով ՀՅԴ –ն և «Ծառուկյան» դաշինքը ևս պարտվել են, հիմա քաղաքական առումով իրենց նկատմամբ ներողամտություն է դրսևորվում:
Ազատ Արշակյանը կարծում է, որ հին համակարգով, քաղաքական մոտեցումներով ամբողջական հեղափոխություն չի կարող լինել , դա դեռևս ապստամբություն է:
Ազատ Արշակյանը ճիշտ է համարում այն, որ ՔՊ-ն Երևանի ավագանու ընտրություններին միայնակ է մասնակցում, այս քայլը, ըստ նրա, ապահարզան է նաև դաշինքի գործընկերներից, որոնց հետո կապված շատ հարցեր կան:
««Հանրապետություն» կուսակցությունը 1998 թ-ի «ՀՀԿ»-ի մնացորդն է, մասնաճյուղը: Եթե Նիկոլ Փաշինյանը հետևողական լինի՝ նաև պետք է 1998թ-ի սահմանադրական կարգի տապալումից խոսի: Սահմանադրական կարգի առաջին տապալումը 1998թ-ի փետրվարին է եղել, երբ որ Լևոն Տեր-Պետրոսյանը հրաժարական տվեց՝ ենթարկվելով մի շարք ուժերի սպառնալիքներին. ովքե՞ր էին այդ ուժերը՝ ԵԿՄ-ականների քաղաքական թևն էր, այսինքն՝ «շտուռմովիկները», նրանք ՀՀ-ում սահմանադրական կարգը տապալեցին: ՀՀԿ-ը հետագայում տրոհվեց. մի մասն Արամ Սարգսյանի ղեկավարությամբ առանձնացավ, բայց նրանք ՀՀԿ-ի մի մասն են: Եթե դա քննվի՝ այդ կուսակցության լիդերները ևս պետք է պատասխանատվություն կրեն»,- շեշտեց նա:
Մանրամասները`տեսանյութում










