«Եթե Թրամփին պաշտոնանկ անեն, ամերիկացի ժողովուրդն ապստամբություն կբարձրացնի»․ Թրամփի փաստաբան

10:30 • 24.08.18

Միացյալ Նահանգների նախագահ Դոնալդ Թրամփի փաստաբան ու Նյու Յորքի նախկին քաղաքապետ Ռուդոլֆ Ջուլիանին հայտարարել է, որ եթե Դեմոկրատական կուսակցության ներկայացուցիչները, Կոնգրեսում մեծամասնություն կազմելով, պաշտոնանկության գործընթաց սկսեն Թրամփի նկատմամբ, ապա ԱՄՆ-ում կարող է իսկական ապստամբության ալիք բարձրանալ։ Այս մասին Ջուլիանին ասել է Sky News-ին տված հարցազրույցում։

«Դուք կարող եք պաշտոնանկ անել (Թրամփին) միայն քաղաքական դրդապատճառներով, և այդ դեպքում ամերիկացի ժողովուրդն ապստամբություն կբարձրացնի», - ասել է նախագահի փաստաբանը։

Ավելի վաղ Թրամփը, խոսելով հնարավոր պաշտոնանկության գործընթացի մասին, ասել էր․ «Չգիտեմ, թե ինչպես կարելի է պաշտոնանկության գործընթաց սկսել մեկի հանդեպ, ով հրաշալի գլուխ է հանում իր խնդիրներից։ Եթե իմ նկատմամբ երբևէ նման գործընթաց սկսվի՝  (միջազգային) շուկաները կտապալվեն»։

Նոյեմբերին կայանալիք Կոնգրեսի միջանկյալ ընտրությունները մեծ նշանակություն ունեն ԱՄՆ-ի համար։ Եթե Կոնգրեսում մեծամասնություն կազմեն դեմոկրատները՝ նրանք ի զորու կլինեն պաշտոնանկության գործընթաց սկսել գործող նախագահի նկատմամբ։