38 կողմ, 5 դեմ, 3 ձեռնպահ. Երևանի ավագանին հաստատեց քաղաքի 2019 թվականի բյուջեն (տեսանյութ)

Երևանի ավագանին հաստատեց Երևան քաղաքի 2019 թվականի բյուջեն, որով նախատեսվում են 83 մլրդ 77 մլն 572.0 հազ. դրամ եկամուտներ, 84 մլրդ 346 մլն 812.0 հազ. դրամ ծախսեր, դեֆիցիտը՝ 1 մլն 269.240 հազ. դրամ։

Երևանի 2019 թվականի բյուջեի նախագիծն ընդունվեց ձայների 38 կողմ, 5 դեմ, և 3 ձեռնպահ հարաբերակցությամբ:

Հիշեցնենք, որ Երևանի 2019թ. բյուջեի նախագծով «Կառավարման մարմնի պահպանում» ծրագրով ծախսեր են նախատեսվել 9,112,386.1 հազ. դրամ կամ ընդհանուր ծախսերի շուրջ 10.8 %–ը, ինչը 2018 թվականի ճշտված համապատասխան ցուցանիշից ավելի է 989,485.6 հազ. դրամով: Նշված ծրագրով նախատեսված ծախսերում էական տեսակարար կշիռ է կազմում աշխատավարձի ֆոնդը՝ 5,213,185.9 հազ. դրամ:

Նշենք, որ ավելի վաղ «Լույս» դաշինքն առանձնացրել էր խնդրահարույց հոդվածները և համեմատել նախորդ տարվա նախագծի հետ:

Ըստ նրանց՝ պարգևատրումների, դրամական խրախուսումների և հատուկ վճարների բյուջեն նախորդ տարվա 758.5 մլն-ից աճել է մինչև 1 մլրդ 991.4 մլն: Ծախսային այս հոդվածը ավելացվել է 1 մլրդ 232.9 մլն դրամով:

Արտասահմանյան գործուղումների գծով ծախսերի բյուջեն նախորդ տարվա 62.7 մլն դրամից աճել է մինչև 112.7 մլն: Ծախսային այս հոդվածը ավելացվել է 50 մլն դրամով: