Թրամփն ամերիկյան անօդաչուի խոցմանն ի պատասխան Իրանին հարվածելու թույլտվություն է տվել, սակայն վերջին պահին հետ է կանգնել. լրատվամիջոցներ

10:40 • 21.06.19

Միացյալ Նահանգների նախագահ Դոնալդ Թրամփն Իրանի կողմից ամերիկյան 180 մլն դոլար արժողությամբ անօդաչու թռչող սարքի խոցմանն ի պատասխան երկրի զինված ուժերին նախնական թույլտվություն է տվել Թեհրանին հարվածելու վերաբերյալ, սակայն վերջին պահին հետ է կանգնել որոշումից: Այս մասին գրում է բրիտանական The Guardian պարբերականը՝ անանուն պաշտոնյայի հղումով:

Քաջատեղյակ աղբյուրի փոխանցմամբ՝ կործանիչներն ու նավերը կազմ-պատրաստ են եղել, սակայն Իրանի ուղղությամբ որևէ հրթիռ այդպես էլ չի արձակվել: Թրամփը վերջին պահին դեմ է գնացել պետքարտուղար Մայք Պոմպեոյի, ազգային անվտանգության հարցերով խորհրդական Ջոն Բոլթոնի և Կենտրոնական հետախուզական վարչության տնօրեն Ջինա Հասփելի խորհրդին՝ որոշելով չհարվածել: Միևնույն ժամանակ չի բացառվում, որ այդ հարվածները կարող են իրականացվել ավելի ուշ:

Անցած գիշեր Թրամփը Սպիտակ տանը խորհրդակցություն է անցկացրել ազգային անվտանգության հարցերով բարձրաստիճան պաշտոնյաների և կոնգրեսական առաջնորդների հետ. քննարկվել են Իրանին համարժեք պատասխան տալու հավանական տարբերակները:

Trump, pictured with Secretary of State Mike Pompeo, left, National security adviser John Bolton, center, and White House press secretary Sarah Sanders, is said to have approved military strikes against Iran in retaliation for downing a US drone but pulled back last minute

Այդ հանդիպումից հետո ԱՄՆ ռազմական և դիվանագիտական ոլորտների պաշտոնյաները համոզված են եղել, որ Իրանի ուղղությամբ հրթիռակոծում է իրականացվելու:

Ամերիկյան կողմի հարձակման հավանական թիրախներից մեկը եղել է S-125 Neva/Pechora «ցամաք-երկինք» դասի հրթիռային համակարգը, որով էլ, ամենայն հավանականությամբ, խոցվել էր ամերիկյան անօդաչուն: Այս մասին հայտնել է Պենտագոնի ներկայացուցիչը:

Iran said it had recovered parts of a US spy drone in its territorial waters, after downing the aircraft in a missile strike slammed by President Donald Trump as a "big mistake"

Նախքան հանդիպումը Թրամփը չէր բացառել, որ US Global Hawk անօդաչուն կարող էր խոցված լինել «սանձարձակ և հիմար իրանցի զինծառայողի կողմից՝ առանց Թեհրանի թույլտվության»:

Ինչպես ավելի վաղ հայտնել էր tert.am-ը, ԱՄՆ-ն սկզբում հերքել էր, որ Իրանն ամերիկյան անօդաչու է կործանել: Իրանն իր հերթին հայտարարել էր, որ լրտեսական անօդաչուն ներխուժել էր երկրի օդային տարածք և խոցվել է հարավային Հորմոզգան նահանգի երկնքում: Այնուհետ ամերիկյան կողմն ասել էր, որ իրենց անօդաչուն խոցվել է Հորմուզի նեղուցի միջազգային օդային տարածքում՝ իրանական «ցամաք-երկինք» դասի հրթիռով:

Իրանի Ազգային անվտանգության գերագույն խորհրդի քարտուղար Ալի Շամխանին, մեկնաբանելով միջադեպը, հայտարարել է, որ Իրանը երբեք թույլ չի տա խախտել իր օդային սահմանները:

«Մեր օդային տարածքը կարմիր գիծ է, և Իրանը մշտապես ուժեղ պատասխան է տալու օդային սահմանների խախտման ցանկացած դեպքի»,-ասել է պաշտոնյան:

This grainy black and white footage shows the drone as it plummets from the sky

Երկու պետությունների առանց այդ էլ լարված հարաբերություններն ավելի են սրվել հունիսի 13-ին Օմանի ծոցում տեղի ունեցած միջադեպից հետո: Հայտնի է, որ Միացյալ Նահանգներն Օմանի ծոցում երկու նավթային լցանավերի նկատմամբ իրագործված հարձակման համար մեղադրում է Իրանին, որը, սակայն, հերքում է այդ մեղադրանքները: