Իմ ազատման մեջ Արսեն Թորոսյանի դերն ակնհայտ է. նա ցանկանում է, որ տեսչական մարմինը լինի իր անձնական գործիքը. Էդգար Խուրշուդյան

Կարծում եմ՝ ակնհայտ է, որ ամբողջ խնդիրն առաջացել է գարդասիլի հետ կապված պատվաստումների գործընթացի վերաբերյալ մեր հայտնաբերած ինֆորմացիայից: Այս մասին Tert.am-ի հետ զրույցում ասաց Առողջապահական և աշխատանքի տեսչական մարմնի արդեն նախկին ղեկավար Էդգար Խուրշուդյանը՝ անդրադառնալով իր պաշտոնանկության պատճառներին:

Խուրշուդյանի պաշտոնանկության պատճառների մասին, հիշեցնենք, վարչապետ Նիկոլ Փաշինյանին հարցմամբ էր դիմել «Առողջ Հանրություն» ՀԿ նախագահ, բժիշկ-նեյրովիրաբույժ
Մարինա Խաչատրյանը: Նա, մասնավորապես, նշել էր, որ Խուրշադյանին հեռացրել են ոչ միայն Արսեն Թորոսյանի, այլև վարչապետի տիկնոջ՝ Աննա Հակոբյանի միջամտության արդյունքում։

«Աննա Հակոբյանի հետ կապված որևէ տեղեկատվություն չունեմ այս պահի դրությամբ, չեմ կարող ասել՝ որքանով է եղել նրա գործոնն իմ ազատման հետ կապված, իսկ Արսեն Թորոսյանի մասով, կարծում եմ, ակնհայտ է»,- ասաց նա:

Tert.am-ի ճշտող հարցին՝ առողջապահության նախարար Արսեն Թորոսյանն ինչու պետք է ցանկանար իր աշխատանքից ազատումը, պատասխանեց. «Իր տեսակետից իր գործընթացների համար ճիշտ բան է արել: Ենթադրում եմ, որպեսզի խոչընդոտ չունենա իր պատվաստումների ծրագրի հետ կապված: Իր համար հարմար տարբերակ է,  մանավանդ, հետագայում էլ եթե տեսչական մարմնի ղեկավարը լինի իր կողմից նշանակված մարդ, այդ խնդիրը միանշանակ դուրս կգա, իսկ վերահսկողությունն արդեն կլինի ոչ լիարժեք, այսինքն՝ կախված նախարարից»:

Խուրշուդյանն այս պահին չի ուզում որևէ քայլ նախաձեռնել, ցանկանում է մի քիչ սպասել: Նշեց՝ հնարավոր է ասուլիսով հանդես գա, որովհետև որոշակի նյութեր կան գարդասիլի հետ կապված, և իր կարծիքով՝ դրանք հանրությանը կհետաքրքրեն:

Իսկ թե ինչ նյութերի մասին է խոսքը, Էդգար Խուրշուդյանն ասաց, որ տղամարդկանց գարդասիլով պատվաստելու տարիքային շեմի հետ կապված խնդիրներ կան:

«Տեսչականից մենք հարցումներ էինք արել և արտադրողներից, և միջազգային կազմակերպություններից, որտեղ հստակ ասվել էր, որ տարիքային շեմի հետ կապված մենք ինչ-որ խնդիր ունենք: Ընդհանարապես, ցուցումով 26-ից մինչև 47 տարեկան տղամարդկանց պատվաստում այդ գարդասիլ պատվաստանյութով նախատեսված չէ: Պատվաստանյութի տուփի վրա էլ նման ցուցում չկա, այդ դեղն այդ տարիքի տղամարդկանց համար ցուցված չէ, բայց նախարարի հրամանով այդ տարիքի տղամարդիկ էլ պետք է պատվաստվեն: Այսինքն՝ արտադրողն ասում է, որ չկա նմանատիպ ցուցում. եվրոպական և միջազգային կառույցների  հարցումները ևս ասում են, որ այդ դեղը այդ մարդկանց համար կիրառելի չէ»,- պատմեց նա և հավելեց.

«Այս հարցումների մասին նախարար Արսեն Թորոսյանը, բնականաբար, տեղյակ է, որ այդ ինֆորմացիան եկել է տեսչական մարմին, ու այս ամբողջ ագրեսիան ես ինչ-որ կերպ կապում եմ նաև դրա հետ»:

Խուրշուդյանը շեշտեց՝ իր ամբողջ խնդիրն այն է եղել, որ պատվաստումների գործընթացը չվնասվի: «Եթե մենք խնդիր ունենք ուղղակի սպառել դեղը, դա այլ հարց է, բայց եթե դա բարի նպատակով է արվում, պետք է ճիշտ արվի: Դեղն այն հարցը չէ, որ ոնց ուզենանք, իրեն կիրառենք, այստեղ ամբողջ խնդիրը դրանից է: Ես դեմ եմ վնաս տալուն, որ եթե մի բան անում ես, և որը հակացուցված է, դա չպետք է անես, սա պարզ տրամաբանություն է»,- ասաց Էդգար Խուրշուդյանը:

Հարցին էլ՝ արդյոք այլ կերպ իր իրավունքների համար չի պայքարելու, նա պատասխանեց. «Դրա մասին չեմ մտածում, բացի այդ՝ այս պայմաներում, եթե այս տարբերակով պետք է աշխատի համակարգը, իմ մոտեցումներին, իմ գաղափարներին դեմ է: Եթե անկախ մարմինն, այնուամենայնիվ, ենթարկվի նախարարին ու կատարի նրա ուզածը կամ չուզածը, դա ինձ համար ընդունելի տարբերակ չէ: Այսինքն՝ այդ խաղի կանոններով աշխատելն ինձ համար հակացուցում է»:

Նա նշեց, որ իրեն փոխարինելու համար մի քանի անուններ են շրջանառվում, բայց չցանկացավ դրանք հնչեցնել: «Մեծ հաշվով հասկանալի է, որ նշանակվելու է նախարարի ցանկալի մարդը: Եթե ինքը կարողանում է այս հարցն այս տարբերակով լուծել, բնականաբար, այդպես էլ կարող է լինել»,- ասաց նա:

Էդգար Խուրշուդյանը չբացառեց, որ Առողջապահական և աշխատանքի տեսչական մարմնում հնարավոր են նաև այլ պաշտոնանկություններ: «Հնարավոր է՝ այլ պաշտոնանկություններ էլ լինեն, որովհետև երբ նոր պետ է նշանակվում, հնարավոր է՝ տեղակալների փոփոխություններ էլ լինեն: Կարող եմ ասել՝ այն գիծը, որը բռնել էր տեսչական մարմինը և փորձում էր անկախ լինել նախարարությունից իմ ղեկավարության օրոք, շատ ճիշտ որոշում էր: Եթե հիմա այդ ուղղությունից շեղվում է տեսչական մարմինը, ապա մենք առողջապահության ոլորտում որևէ հսկողություն չենք ունենա, այլ կունենանք մարմին, որը լինելու է նախարարի անձնական գործիքը»,- ընդգծեց նա: