Երկու բրիտանուհի քաղցկեղ հիվանդությունը վաղ շրջանում հայտնաբերել են իրենց շների շնորհիվ

Մեծ Բրիտանիայում բնակվող երկու կանայք պատմել են իրենց շների մասին, որոնք հոտառության շնորհիվ կարողացել են իրենց մոտ հայտնաբերել քաղցկեղ հիվանդություն: Այս մասին գրում է Daily Mirror-ը:

Լոնդոնի բնակչուհի Էմմի Սմիթը պատմել է, որ իրենց շունը` Չառլին, սկսել է տարօրինակ վարքագիծ դրսևորել` թռչկոտել և հոտոտել իր աջ կուրծքը: Սկզբում կինը մտածել է, թե իր վրայից սնունդի հոտ է գալիս, սակայն Չառլին շարունակել է իր գործողություններն ու սկսել է անհանգիստ հաչել:

Էմմին ենթադրել է, որ շունը ցանկանում է իրեն ինչ-որ բան ասել: Նա շոշափել է իր աջ կուրծքն ու գոյացություն է զգացել: Հետո դիմել է բժիշկներին, որոնք ախտորոշել են քաղցկեղ հիվանդություն: Բուժումը բարեհաջող է ընթացել: Բժիշկները փաստել են, որ եթե Սմիթը ժամանակին չդիմեր իրենց օգնությանը, ապա հետևանքները ծանր կլինեին:

Աղբյուրը գրում է ևս մեկ բրիտանուհու` բժիշկ Քլեր Գեսթի մասին, որի Դեզդի անունով շունը ևս սկսել է հոտոտել, հաչել և ձեռքը դնել նրա կրծքի վրա: Բժշկական հետազոտությունից հետո ևս հայտնաբերվել է քաղցկեղ հիվանդություն, որը եղել է վաղ շրջանում:

Գեստը դրանից հետո որոշել է բարեգործական նախագիծ ստեղծել: Նշվում է, որ նրա ստեղծած հաստատությունում շները հոտառության շնորհիվ հայտնաբերել են քաղցկեղի 550 դեպք: