Գիտնականները սև խոռոչի ստվերի լուսանկարի համար 3 միլիոն դոլար են ստացել

Event Horizon Telescope նախագծի անդամ գիտնականները, որոնք պատմության մեջ առաջին անգամ աշխարհին են ներկայացրել սև խոռոչի ստվերի լուսանկարը, արժանացել են հիմնարար ֆիզիկայի ոլորտում հեղինակավոր Breakthrough Prize մրցանակին, հայտնում է մրցանակի կազմկոմիտեի պաշտոնական կայքը:

Նշվում է, որ ամբողջ թիմի անունից մրցանակը կստանա նախագծի ղեկավար, Աստղաֆիզիկայի Հարվարդ-Սմիթսոնյան կենտրոնից Շեպ Դոուլմանը:

Երեք միլիոն դոլար կազմող մրցանակը հավասարապես կբաշխվի նախագծի 347 անդամների միջև:

Event Horizon Telescope-ը միավորում է աշխարհի տարբեր կետերում գտնվող մի քանի ռադիոհեռադիտակների: 2017 թվականին ցանցը կազմված է եղել 8 սարքից և պլանավորվում է ցանցի հետագա ընդլայնումը:

Հիշեցնենք, որ ապրիլին EHT (Event Horizon Telescope) նախագիծը հրապարակել է սև խոռոչի` մարդկության պատմության մեջ արված առաջին լուսանկարը: