Իջևանի քաղաքապետ Վարդան Ղալումյանը հրաժարականի դիմում է ներկայացրել, Տավուշի մարզպետը պատճառներից տեղյակ չէ

13:14 • 06.09.19

Իջևանի քաղաքապետ Վարդան Ղալումյանը հրաժարականի դիմում է ներկայացրել. Tert.am-ի տեղեկությունը հաստատեց Տավուշի մարզպետ Հայկ Չոբանյանը:

«Այսօր օրենքով սահմանված կարգով համապատասխան դիմում է ուղարկել ինձ»,-ասաց մարզպետը և նշեց, որ պատճառները նշված չեն:

Իսկ թե ինքը տեղյակ է, թե ինչն է քաղաքապետի հրաժարականի պատճառը, մարզպետը բացասական պատասխան տվեց:

Հիշեցնենք, որ Իջևանի քաղաքապետ Վարդան Ղալումյանի նկատմամբ քրեական գործ է հարուցված` պաշտոնեական դիրքը չարաշահելու հիմքով:

Դիլիջանում կազմակերպված «Իմ քայլը հանուն Տավուշի» բիզնես համաժողովին քաղաքապետը լրագրողների հետ զրույցում նշել էր, որ ինքը համոզված է, որ քրեական արարք թույլ չի տվել, և որևէ խնդիր չի առաջանա, քանի որ շարժվել է օրենսդրության և Սահմանադրության համաձայն։

Հիշեցնենք նաև, որ խոսքը Իջևանի բնակիչներից մեկին պատկանող տարածքը հանրային պուրակ դարձնելու քաղաքապետի մտադրության մասին է, որի դեմ քաղաքացին բողոքել էր։

Վարդան Ղալումյանի հետ կապ հաստատել չհաջողվեց: