Մահաթմա Գանդիի ակնոցը Մեծ Բրիտանիայում վաճառվել է 340․000 դոլարով
Ժամանակակից Հնդկաստանի «հայր-հիմնադիր», Մեծ Բրիտանիայից անկախության պայքարի գաղափարախոս, քաղաքական և հոգևոր առաջնորդ Մահաթմա Գանդիին պատկանած ակնոցը վաճառվել է 260․000 ֆունտ ստերլինգով (340․000$):
Ինչպես փոխանցում է BBC News-ը, վաճառքն իրականացրել է բրիտանական East Bristol Auctions աճուրդի տունը օգոստոսի 21-ին: Վերջին տիրոջն ակնոցը բաժին էր հասել հորեղբորից, որը 1910-1930 թվականներին աշխատել էր Հարավային Աֆրիկայում, երբ այնտեղ էր գտնվում նաև Գանդին:
Ինչպես երևում է, վաճառողն ինքը տեղյակ չի եղել, որ ակնոցը կարող է նման արժեք ունենալ: Նա ակնոցը ծրարով թողել էր աճուրդի տան փոստարկղում՝ կից գրառում թողնելով. «ակնոցը Գանդիին է պատկանել, զանգահարեք ինձ»:
Աճուրդի տան ներկայացուցչի խոսքով՝ դա իրենց մոտ երբևէ գտնված ամենահայտնի ակնոցն է և երբևէ վաճառված ամենաարժեքավոր պատմական իրը:











