«Ազատության ուղի»․ Վիլնյուսից մինչև բելառուսական սահման տասնյակ հազարավոր մարդիկ կենդանի շղթա են կազմել՝ հաջակցություն Բելառուսում տեղի ունեցող ցույցերի (լուսանկարներ)
Լիտվայի մայրաքաղաք Վիլնյուսից մինչև բելառուսական սահման տասնյակ հազարավոր մարդիկ նախօրեին կենդանի շղթա են կազմել՝ հաջակցություն Բելառուսի նախագահ Ալեքսանդր Լուկաշենկոյի դեմ անցկացվող բողոքի ցույցի մասնակիցների, գրում է meduza.io կայքը։
«Ազատության ուղի» անվանումը ստացած այս ակցիան նվիրված է եղել «Բալթյան ուղի» ակցիայի 31-ամյակին։ Այսպես՝ 1989 թվականի օգոստոսի 23-ին Բալթյան երկրների անկախության համար իրականացվող զանգվածային շարժման շրջանակում Լիտվայի, Լատվիայի և Էստոնիայի ավելի քան 2 միլիոն բնակիչ Վիլնյուսից Ռիգայով դեպի Տալլին կենդանի շղթա էին կազմել։
Հիշեցնենք, որ երեկ, տարբեր գնահատականների համաձայն, 100-150 հազար ցուցարարներ հավաքվել են Անկախության հրապարակում, որտեղից շարժվել են «Պլանետա» հյուրանոց, որը տեղակայված է «Մինսկը՝ հերոս քաղաք» հուշակոթողի մոտակայքում: Հարյուրավոր զինվորականներ շրջապատել են «Մինսկը՝ հերոս քաղաք» հուշակոթողի տարածքը:
Բողոքի ցույցերը Մինսկում չեն դադարում 14 օր շարունակ: Երկրի քաղաքացիներն իրենց դժգոհությունն են հայտնում օգոստոսի 9-ին կայացած նախագահական ընտրությունների արդյունքներից, որոնց համաձայն հաղթող է ճանաչվել գործող նախագահը՝ ստանալով ձայների 80 տոկոսը: Ցույցերի առաջին օրերին հազարավոր մարդիկ էին ձերբակալվել, հարյուրավորները՝ վիրավորվել, 3 ցուցարար էլ մահացել է:


















