Ճանապարհային ոստիկանությունը 25.000 դրամի ոչ արդարացված ակտ է կազմել. ասել է՝ մենք հիմա բյուջե պետք է լցնենք, թե՝ չէ. քաղաքացին՝ իրեն անհիմն տուգանելու մասին
Երկու օր առաջ, Արարատի մարզում Ճանապարհային Ոստիկանությունն ինձ կանգնեցրել է, ասել, թե ինձ տուգանում են, քանի որ մեքենայիս ապակիները սահմանվածից մուգ են, ամբողջ ընթացքում լեյտենանտ Միսակ Սողոմոնյանը /Շաղափլու գյուղի բնակիչ է/ շատ կոպիտ ու վիրավորական տոնով է խոսել: Ինձնից որևէ բացատրություն չի ուզել լսել, ասել է՝ գնացեք, ուր ուզում եք դիմեք, ես ակտը գրելու եմ:
Այս մասին այսօր Tert.am-ի հետ զրույցում ասաց Արարատի մարզի Սուրենավան համայնքի բնակիչ Բենիամին Կիրակոսյանը՝ ներկայացնելով, որ Ճանապարհային Ոստիկանության մոտեցումը սխալ, անհիմն և ոչ արդարացված է եղել:
«Լեյտենանտին ներկայացրի, որ մեքենան գործարանից գնված է և այս ընթացքում որևէ փոփոխություն չի եղել ապակիների վրա, ինձ պատասխանում է՝ Դուք ինձ չպետք է ասեք, մենք հիմա բյուջե պետք է լցնենք, թե՞ չէ: Ասում եմ՝ իմ հաշվի՞ն եք բյուջե լցնելու, իմ մեքենան հին է ու կրկնել եմ, որ գործարանային է»,-ասաց նա և հավելեց, որ յուրաքանչուր ստուգում ցույց է տվել, որ իր մեքենայի ապակիների վրա որևէ փոփոխություն չի եղել, սակայն լեյտենանտը պնդել է, թե իր ապարատն այդպես է ցույց տալիս:
Բենիամին Կիրակոսյանը նշեց, որ ամեն դեպքում լեյտենանտ Սողոմոնյանն արձանագրություն է կազմել, ըստ որի՝ քաղաքացին պետք է 25.000 դրամի ակտ վճարի խախտման համար, քաղաքացին գրել է, որ համաձայն չէ որոշման հետ և հրաժարվում է այն վճարելուց: Քաղաքացին շեշտեց, որ որևէ կերպ չի ուզել Ճանապարհային ոստիկանի և իր միջև խնդիր առաջացնել, փորձել է լեյտենանտի հետ կապ հաստատել, որն էլ ասել է, թե քաղաքացու հետ որևէ խոսելու թեմա չունի:
Ըստ նրա՝ իր անմեղությունն ապացուցելի է և պատրատ է մինչև վերջ դա ներկայացնել, քանի որ նրա խոսքով՝ լեյտենանտը կոպիտ ու անքաղաքավարի է խոսել իր հետ: Նա նշեց, որ այդ տուգանքի մասին դեռ ծանուցում չի ստացել:
Դեպքի մասով Tert.am-ը փորձեց պարզաբանում ստանալ Ոստիկանությունից, սակայն Ոստիկանության լրատվականից փոխանցեցին, որ ճիշտ կլինի՝ քաղաքացին իր բողոքը Ոստիկանություն ներկայացնի, որից հետո կստանա իր խնդրի վերաբերյալ պատասխանը:










