Ամերիկացի զբոսաշրջիկը Կանադայի կարանտինային կանոններին չհետևելու համար ստիպված կլինի 500 000 դոլար վճարել
Կանադայի իշխանությունները մտադիր են տուգանել ամերիկացի զբոսաշրջիկին կես մլն դոլարով՝ կորոնավիրուսի համավարակի պատճառով կարանտինային կանոնները կրկնակի խախտելու համար, գրում է Travel and Leisure-ը:
Ամերիկյան Կենտուկի նահանգի բնակիչ Ջոն Փենինգթոնը հունիսին ճամփորդել է Ալյասկայից ԱՄՆ մայրցամաքային հատված, որի ընթացքում հաստատվել է կանադական Բանֆ ազգային պարկի շքեղ հյուրանոցներից մեկում, որը, սակայն, համավարակի պատճառով փակ է ամերիկացիների համար: Հյուրանոցի աշխատակիցները հյուրի մասին տեղեկությունները փոխանցել են իշխանություններին:
ԱՄՆ-ում վարակակիրների թվի աճի պատճառով Կանադան մարտի 21-ից փակել է իր հարավային սահմանը: Ճամփորդներին, որոնք երկրի տարածքով Ալյասկայից ամերիկյան նահանգներ են մեկնում, անհրաժեշտ է կիրառել ամենակարճ երթուղիները: Նրանց արգելված է հյուրանոցներում հաստատվել և այցելել ազգային պարկեր:
Հյուրանոցում ամերիկացուն հայտնաբերելով՝ կանադացի ոստիկանները նրան տուգանել են 900 դոլարի չափով: Նրան թույլ են տվել գիշերել, սակայն արգելել են լքել տարածքը, իսկ առավոտյան նա պարտավոր է եղել լքել Կանադան: Սակայն դրա փոխարեն նրան նկատել են ազգային պարկում զբոսնելիս:
Փենինգթոնը ոստիկաններին ասել է, որ դուրս էր եկել սնունդ գնելու, սակայն վերջիններս չեն հավատացել ամերիկացուն, քանի որ հյուրանոցում մի քանի ռեստորան է գործում:
Իրավախախտը ձերբակալվել է և պետք է կանադական դատարանի առաջ կանգնի նոյեմբերին: Նրան սպառնում է 500 000 դոլարի չափով տուգանք կամ կես տարի ժամկետով կալանք:










