«Ոստիկանների ռեակցիան իմ սպիտակ-կարմիր զգեստին նման էր ցուլի՝ կարմիր կտոր տեսնելիս արձագանքին». Բելառուսի բնակչուհուն դատում են ընդդիմության «խորհրդանիշի» գույներով զգեստ կրելու համար (լուսանկար)
Բելառուսի Բրեստ քաղաքի բնակչուհի Նատալյա Կլիմովիչին դատում են ընդդիմության «խորհրդանիշ» դրոշի գույներով զգեստ կրելու համար: Նատալյային ամուսնու՝ Վլադիսլավի հետ բերման էին ենթարկել օգոստոսի 11-ի երեկոյան՝ իրենց աշխատավայրից: Նշվում է, որ ամուսիններն աշխատում են ոսկերչական արհեստանոցում:
Ինչպես գրում է «Բրեստի թերթ»-ը, ոստիկանության աշխատակիցներն արհեստանոց են այցելել անսպասելի և սկսել զննել տարածքը:
«Նրանք մտան հաշվապահության սենյակ ու տեսան ինձ: Ոստիկաններից մեկը հագիս խալաթը մի կողմ գցեց ու տեսավ, որ ես սպիտակ-կարմիր-սպիտակ զգեստ եմ կրում (Բելառուսում բողոքի ցույցերի մասնակիցների խորհրդանիշ դրոշի գույներով-Խմբ.): Նա հարցրեց, թե ինչ է սա, ու ասաց, որ հետևեմ իրեն: Ամուսինս վրդովվեց և հարցրեց, թե ինչի հիման վրա են ինձ տանում: Նրան պատասխանեցին, թե «Եթե այդքան խելացի ես, դու էլ կգաս մեզ հետ»: Մեզ տարան ոստիկանական բաժանմունք: Բնականաբար, մեզ ոչ ոք չբացատրեց, թե ինչի համար են բերման ենթարկում»,- պատմել է կինը:

Նրա ամուսնուն բաց են թողել հաջորդ օրը և առանց դատի, իսկ Նատալյան մեկուսարանում է անցկացրել 2 օր: Նրան բաց են թողել՝ տեղեկացնելով, որ օգոստոսի 28-ի առավոտյան դատարան ներկայանա: Նրան մեղադրանք է առաջադրվել զանգվածային միջոցառումների կազմակերպման կամ անցկացման կանոնների խախտման հոդվածով:
«Ոստիկանների ռեակցիան իմ սպիտակ-կարմիր-սպիտակ զգեստին նման էր ցուլի՝ կարմիր կտոր տեսնելիս արձագանքին»,- հավելել է նա:
Այն հարցին, թե որտեղից նրան նման զգեստ, կինը պատմել է, որ այդ գույներով զգեստ և ամուսնու համար վերնաշապիկ նա կարել է տվել: Դրանք պատրաստ են եղել հուլիսի 14-ին՝ մինչ երկրում սկսված բողոքի ցույցերը: Այդ օրվանից նրանք միշտ կրել են այդ հագուստը: Նրանք այդ հագուստով մասնակցել են նաև Գրոդնո և Բրեստ քաղաքներում նախագահի նախկին ընդդիմադիր թեկնածու, այժմ ընդդիմության առաջնորդ Սվետլանա Տիխանովսկայային աջակցող հանրահավաքներին: Նատալյան հենց այդ զգեստով է քվեարկել նախագահական ընտրությունների օրը, այն կրել է նաև օգոստոսի 10-ին, իսկ արդեն օգոստոսի 11-ին այն կրելը քաղաքական հանցագործություն է համարվել:

Կինը նշել է, որ նման հագուստով ինքն ու իր ամուսինը ցանկացել են իրենց քաղաքացիական դիրքորոշումը հայտնել՝ առանց որևէ կարգախոսների, պաստառների:

Հիշեցնենք, որ բողոքի ցույցերը Բելառուսում չեն դադարում օգոստոսի 10-ից ի վեր: Երկրի քաղաքացիներն իրենց դժգոհությունն են հայտնում օգոստոսի 9-ին կայացած նախագահական ընտրությունների արդյունքներից, որոնց համաձայն հաղթող է ճանաչվել գործող նախագահը՝ ստանալով ձայների 80 տոկոսը:










