Ֆրանսիայի կողմից Արցախի ճանաչումը անհավանական ժանրից չէ. Վիենի փոխքաղաքապետ (տեսանյութ)

19:38 • 21.10.20

Արցախի անկախության ընդունումը կլինի ռադիկալ փոփոխություն Ֆրանսիայի արտաքին քաղաքականության մեջ: Այս մասին Tert.am-ի հետ զրույցում նշել է ֆրանսիական Վիեն քաղաքի կրթության հարցերի փոխքաղաքապետ Լևոն Սաքունցը: Նրա կարծիքով՝ 25 տարվա հավասարակշիռ դիրքորոշումը բերել է նրան, որ Արցախի խաղաղ բնակչությունը պարբերաբար կրակի տակ է հայտնվել, հետևաբար, արմատական փոփոխության անհրաժեշտություն կա:

Խոսելով հնարավոր ռիսկերի մասին՝ Սաքունցն ընդգծել է, որ երկիրը կարող է խնդիրներ ունենալ Մինսկի խմբի եռանախագահությունում, հարցեր կառաջանան նաև ՆԱՏՕ-ում, քանի որ թե՛ Ֆրանսիան, թե՛ Թուրքիան կառույցին անդամակցող երկրներ են:

Լևոն Սաքունցի պնդմամբ հնարավոր է այդ խնդիրներին խելացի լուծումներ տալ, գնալ այդ քայլին ու պայքարել դրա բացասական հետևանքների դեմ:

Ֆրանսահայ քաղաքական գործչի կարծիքով՝ Արցախի անկախության ճանաչումը կարող է դեմ լինել Ֆրանսայի թե՛ տնտեսական, թե՛ դիվանագիտական շահերին, բայց դա անհավանական ժանրից չէ:

Նշենք, որ Ֆրանսիայի Սենատում Արցախի անկախության ճանաչման հարցը հնչեցնող առաջամարտիկը Վալերի Բուայեն է, իսկ Ազգային ժողովում՝ Ֆրանսուա Պուպոնին: Արդեն 20 պատգամավոր ստորագրել է, որ Արցախի ճանաչման բանաձևը մտնի ստորին պալատ։ Դա կլինի դեկտեմբերից ոչ շուտ:

Մանրամասները՝ տեսանյութում: