Թե՛ դեսպանատան, թե՛ ոստիկանության կոչն այն է, որ սադրանքների չտրվենք, դուրս չգանք փողոցներ, չպատասխանենք թուրքերին իրենց ձևով. ֆրանսաբնակ Ստելլա Դավթյանը՝ թուրքերի հարձակման մասին (տեսանյութ)

12:31 • 29.10.20

Երեկ Ֆրանսիայում տեղի ունեցած միջադեպի հետևանքով տուժած տղան՝ Գևորգը, արդեն լավ է:  Պետք է տնից դուրս չգալ, զգուշանալ թուրքերի և ադրբեջանցիների հետ բախումներից՝ սադրանքներից խուսափելու համար: Այս մասին այսօր իր ֆեյսբուքյան ուղիղ եթերի ժամանակ ասաց ֆրանսահայ Ստելլա Դավթյանը, որն ականատես է եղել երեկ թուրքերի կողմից հայերի վրա հարձակվելու միջադեպին:

Հիշեցնենք, որ երեկ ֆրանսաբնակ հայերը փակել էին դեպի Վալանս տանող ճանապարհը: Ակցիայի ժամանակ, մինչ հայ ցուցարարները պահանջում էին Ֆրանսիայի նախագահ Էմանուել Մակրոնից և ողջ Եվրոպայից ճանաչել Արցախի անկախությունը և կանգնեցնել պատերազմը, հայերին են մոտեցել թուրքեր և սադրանքի դիմել՝ մուրճով հարվածներ հասցրել, որի հետևանքով 10 հայ էր տուժել:

Նշենք, որ գիշերը Լիոն քաղաքում թուրքերի և ադրբեջանցիների կողմից ակցիաներ են իրականացվել, փնտրել են հայերին, սանձարձակություններ իրականացրել:

Ստելլա Դավթյանը նշեց, որ թշնամու կողմից դրսևորվող ագրեսիան տարբեր տեղերում ևս կլինի: «Այն, ինչ երեկ տեղի ունեցավ, նշան էր այն բանի, որ իրենք իրենց ձեռքով փոսն ընկան: Կոչ եմ անում, որ բոլոր հայերը ռադիկալ քայլերի չդիմեն, մեր քայլերը պետք է լինեն խելացի: Թե՛ դեսպանատան, թե՛ ոստիկանության կոչն այն է, որ սադրանքների չտրվենք, դուրս չգանք փողոցներ, չպատասխանենք թուրքերին իրենց ձևով: Նրանք հիմա ամեն հնարավորություն են փնտրում, որ մեզ հետ խնդիր ունենան, պիտի թույլ չտանք, որ պատմությունը փոփոխեն ու ասեն, որ հայերն են սկսել»:

Մանրամասները՝ տեսանյութում։