«Հակամարտության գոտում խաղաղապահները տեղակայվում են բացառապես երկու կողմերի համաձայնությամբ»․ Պեսկով
ՌԴ նախագահ Վլադիմիր Պուտինը Հայաստանի և Ադրբեջանի նախագահների հետ շփումների ժամանակ քննարկում է Լեռնային Ղարաբաղի հակամարտության կարգավորմանը վերաբերող հարցերի լայն շրջանակ: Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ գործակալությունը։
Մեկնաբանելով ՀՀ վարչապետ Նիկոլ Փաշինյանի՝ Լեռնային Ղարաբաղում ռուս խաղաղապահների տեղակայման օգտին հանդես գալու վերաբերյալ խոսքերը, Պեսկովն ընդգծել է, որ «հակամարտության գոտում խաղաղապահները տեղակայվում են բացառապես երկու կողմերի համաձայնությամբ»։
Հարցին, թե արդյոք ՌԴ նախագահը Հայաստանի և Ադրբեջանի ղեկավարների հետ քննարկել է Լեռնային Ղարաբաղում ՌԴ խաղաղապահ առաքելության հնարավորությունը, Պեսկովը հակիրճ պատասխանել է, որ «ՌԴ նախագահը Երևանի և Բաքվի իր պաշտոնակիցների հետ շփումների ժամանակ քննարկում է հնարավոր կարգավորման հետ կապված հնարավորությունների լայն շրջանակ»։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։










