«ԼՂ հարկամարտության կարգավորման վերաբերյալ Թեհրանի նախաձեռնության առանձնահատկությունը տարածաշրջանային բնույթն է». Իրանի փոխարտգործնախարար

14:27 • 30.10.20

Իրանի փոխարտգործնախարար Աբաս Արաքչին «ՌԻԱ Նովոստի» գործակալությանը տված հարցազրույցում հայտարարել է, որ Ռուսաստանի և Թուրքիայի մասնակցությամբ հնարավոր կլինի տարածաշրջանային մակարդակով կարգավորել Լեռնային Ղարաբաղի ճգնաժամը։

«Իրանի ծրագրի ամենակարևոր առանձնահատկությունն այն է, որ այն տարածաշրջանային բնույթ ունի, ուստի՝ այս մոտեցման և տարածաշրջանում ազդեցություն ունեցող երկրների մասնակցությամբ կարող ենք պայքարել այս ճգնաժամի դեմ և դիմակայել դրան»,- նշել է Արաքչին:

Նշվում է, որ նախօրեին տարածաշրջան կատարած այցի շրջանակներում Արաքչին Մոսկվայում ղարաբաղյան թեմայով բանակցություններ է վարել Ռուսաստանի փոխարտգործնախարար Անդրեյ Ռուդենկոյի հետ։

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։