ՊԲ հրամանատարական կետ մեկանգամյա այցը՝ ՊԲ-ին բարոյական աջակցություն հայտնելու նպատակով, քաղաքական շահարկման առարկա դարձնելն ի՞նչ գործելակերպ է․ Փաշինյանը՝ Աննա Հակոբյանի այցի մասին
Նիկոլ Փաշինյանն իր ուղերձում անդրադարձել է գեներալ-գնդապետ Մովսես Հակոբյանի հայտարարությանը՝ իր տիկնոջ՝ Աննա Հակոբյանի՝ Արցախի ՊԲ հրամանատարական կետում լինելու մասին։
Փաշինյանը, մասնավորապես, ասել է․ «Իմ տիկնոջն է թիրախ դարձնում, մոռանալով հարց տալ՝ իսկ հրթիռակոծվող քաղաքում, որի բնակչության 70 տոկոսը լքել է իր բնակության վայրը, ի՞նչ գործ ուներ վարչապետի ընտանիքի անդամը: Այսինքն՝ Բադեն-Բադենի սանատորիա՞ էր հրթիռակոծվող Ստեփանակերտը, որ այնտեղ գտնվելը փորձ է արվում ներկայացնել որպես իշխանության ցոփության մի աննկարագրելի օրինակ:
Ռմբապաստարաններում մնացած բնակիչներին հաց ու ջուր անձամբ հասցնելը հանցագործությո՞ւն էր: Չէի իմացել»,-ասել է նա:
Փաշինյանն ընդգծել է, որ այդ այցը եղել է իր հանձնարարությամբ։
«Վարչապետի ընտանիքի անդամի մեկանգամյա այցը՝ վարչապետի հանձնարարությամբ, Պաշտպանության բանակի հրամանատարական կետ Պաշտպանության բանակին բարոյական աջակցություն, զորակցություն հայտնելու նպատակով՝ այն պայմաններում, երբ այդ բանակն անընդհատ լուր է ստանում, թե մարդիկ թիկունքում լքում են բնակավայրերը, ահա այս պայմաններում վարչապետի ընտանիքի անդամին ուղարկելը, որ տեսնեն մարդիկ, որ վարչապետի ընտանիքի անդամն է գտնվում Ստեփանակերտում, քաղաքական շահարկման առարկա դարձնելն ի՞նչ գործելակերպ է: Եւ ոմանք Ստեփանակերտից ետ են կանչվել խուճապ տարածելու եւ աղետի բերած ապօրինի միջամտությունների պատճառով, եւ այս հարցերը, ըստ կարգի, դեռ կպարզաբանվեն»,-ասել է նա:










