Այսօր Հայաստանում չկա իշխանություն, որ ի վիճակի է զբաղվել գերիների խնդրով, բանակցություններ վարել թշնամու ու դաշնակիցների հետ. Մհեր Մկրտչյան
Մենք ուզում ենք լսելի դարձնել այն ծնողների ձայնը, որոնց երեխաները գերի են ընկել, այն ծնողների ձայնը, որոնց երեխաները զոհվել են, և մինչ օրս չեն ունեցել հնարավորություն վերցնել զոհված երեխաների դիերը: Այս մասին Շառլ Ազնավուրի հրապարակում մտավորականների հանրահավաքի մեկնարկին հայտարարեց ռեժիսոր Մհեր Մկրտչյանը՝ դիմելով ներկաներին:
Նա նշեց, թե իրենց կողքին կանգնելով՝ ներկաներն ավելի լսելի են դարձնում իրենց ձայնը:
Մկրտչյանը հայտարարեց, թե հանրահավաքի մասին հայտարարության մեջ նշված երեք կետերը, այն է՝ ստիպել ադրբեջանական կողմին ազատել հայ գերիներին, թույլ չտալ հայ գերիների պատվազրկումը Բաքվի շքերթում և շուտափույթ վերադարձնել հայ զինվորների դիերը հարազատներին, կրկնելու են հանրահավաքի բոլոր երեք կազմակերպիչները:
«Այսօր Հայաստանում չկա իշխանություն, որ ի վիճակի է զբաղվել գերիների խնդրով, բանակցություններ վարել թշնամու ու դաշնակիցների հետ, և պայմանավորվել ենք այսօր չխոսել Նիկոլ Փաշինյանի մասին: Մենք խնդրում ենք Հայաստանում ներկայացուցչություններ ունեցող բոլոր երկրներին օգնություն ցուցաբերել ռազմագերիների և զոհվածների դիերի վերադարձի հարցով»,-ասաց նա:
Նա նաև նշեց՝ այսօր ոչ մի քաղաքական գործիչ հարթակ չի բարձրանա: «Պատճառն այն չէ, որ մենք իրենց անարժան ենք համարում կամ արհամարհում ենք: Մենք հասկանում ենք, որ այս ձևաչափով «ֆեյքերի բանակը» վաղը մեզ չի կարող մեղադրել աթոռակռիվ անելու մեջ: Եվս մեկ բան՝ մենք ձեզ հետ ազնիվ են եղել հանրահավաքի մասին հայտարարությունը գրելիս և նշել ենք այս երեք կետերը»,-ասաց նա՝ նշելով, թե խնդրանք ունեն՝ ովքեր համաձայն չեն նշված կետերի հետ, թող գնան ու կազմակերպեն իրենց հանրահավաքը, չբարձրանան հարթակ, չմասնակցեն միջոցառմանը:










