Ռուսաստանից Հայաստան եկավ, որ հավերժ մնա հայրենիքում. Էրիկ Նահապետյանի մայրն ասում է՝ հպարտ է, որ որդին զոհվել է հանուն հայրենիքի (տեսանյութ)
Ռուսաստանից Հայաստան ինքնաթիռի տոմսն առանց հետդարձի էր: Էրիկը եկավ՝ հայրենիքին նվիրելու իր ուժն ու կյանքը: Եկավ ու ձուլվեց իրեն անծանոթ, բայց հարազատ հայրենիքին:
Էրիկ Նահապետյանը 1 տարեկանից ապրել է Ռուսաստանի Դաշնությունում: Նա Հայաստան էր եկել բանակ զորակոչվելուց 3 ամիս առաջ: Հայաստանում մնալն Էրիկի առաջնային նպատակն էր: Ծառայության ավարտին 9 ամիս էր մնացել, երբ սկսվեց պատերազմը:
«Ամսի 10-ին զանգեց, ասացի՝ Էրիկ ջան, բան չմնաց, կռիվն ավարտվում է, ասաց՝ չէ, կռիվը երկար է տևելու», -պատմում է Էրիկ Նահապետյանի մորաքույրը:
Պատերազմի սկզբում Էրիկը բոլորից թաքցրել էր, որ մարտերի ամենաթեժ կետերից մեկում է: Ամեն անգամ մորը զանգելիս ամեն օրը խաղաղ լուսացնելու ուժ ու հույս է տվել: Վերջին զանգը հոկտեմբերի 10-ին է եղել:
«Զանգեց, ասաց՝ մամ ջան, ես լավ եմ, եթե չզանգեմ, չանհանգստանաս, իմ մասին չմտածես: Ու դրանից հետո էլ ձայնը չեմ լսել», - պատմում է Էրիկի մայրը՝ Աննա Աղաջանյանը:
Պատերազմը հերոսի համար ավարտվեց հոկտեմբերի 11-ին: Լավ ծառայության ու իր զենքին հմտորեն տիրապետելու համար Էրիկը շքանշան էր ստացել:
Էրիկը դպրոցում գերազանց է սովորել: Հետո հասկացել է, որ ավելի շատ ուզում է աշխատել. մեքենաները դեռ մանկուց իր տարերքն են եղել:
Էներգիայով լի էր ու էներգիայի աղբյուր՝ շրջապատի համար: Նրա յուրաքանչյուր չարաճճիություն անպայման համեմված էր զրնգուն ծիծաղով: Մինչև ամեն բան իր ուզածով չլիներ, գլուխը բարձին չէր դնի:
Մայրը որդու վերադարձի օրերն էր հաշվում: Բայց Էրիկը բանակ էր զորակոչվել՝ անվերադարձ: Էրիկի գնալուց հետո միայն կարոտն ու դառը հպարտությունն են մնացել:
«Շատ մեծ ցավ եմ ապրում: Սա մեծ դժբախտություն է, բայց հպարտ եմ: Շատ հպարտ եմ, որ որդիս զոհվել է հանուն հայրենիքի», - ասում է Էրիկի մայրը:
Էրիկի հերոսական ճակատագիրը սկսվեց ու ավարտվեց Հայաստանում. նա հավերժ մնաց իր հայրենիքում:
Մանրամասներ՝ տեսանյութում:










