Ֆիզուլիի շրջանում ականի պայթյունի հետևանքով 5 ադրբեջանցի է զոհվել

18:37 • 28.11.20

Ֆիզուլիի շրջանի գյուղերից մեկում, որն անցել է Ադրբեջանի վրեահսկողության տակ, մարդատար ավտոմեքենա է պայթել՝ ականի վրայով անցնելիս: Ինչպես հաղորդում է ТАСС գործակալությունը՝ հղում անելով երկրի Գլխավոր դատախազության մամուլի ծառայությանը, կատարվածի հետևանքով 5 մարդ է մահացել:

«Նոյեմբերի 28-ին 15:20-ի դրությամբ «Տոյոտա» մակնիշի մարդատար ավտոմեքենան նախնական տվյալներով անցել է ականի վրայով Ֆիզուլիի շրջանում, մահացել են մեքենայում գտնվող Ադրբեջանի հինգ քաղաքացիները»,- աղբյուրի փոխանցմամբ՝ ասվում է գերատեսչության կայքում հրապարակված հաղորդագրության մեջ:

Նշվում է, որ քրեական գործ է հարուցվել: Գործի քննությունը հանձնարարվել է Գլխավոր դատախազության Քննչական վարչությանը:  

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր  ավտոմոբիլային և հատուկ տեխնիկա:

ՌԴ խաղաղապահների տեղակայումն Արցախում արդեն ավարտին է հասցվել: