Արգենտինայի ընդդիմությունը երկրի նախագահին դատի է տվել Մարադոնայի հետ հրաժեշտի մասշտաբային արարողություն կազմակերպելու պատճառով

12:44 • 28.11.20

Արգենտինական ընդդիմության ներկայացուցիչները հայտարարել են, որ երկրի նախագահ Ալբերտո Ֆերնանդեսը խախտել է սահմանադրությունը՝ կազմակերպելով ֆուտբոլիստ Դիեգո Մարադոնայի հետ հրաժեշտի մասշտաբային արարողություն ու հաշվի չառնելով կորոնավիրուսի համավարակի հետևանքով սահմանված համաճարակաբանական պահանջները, գրում է La Nacion թերթը։

«Միացյալ հանրապետականներ» լիբերալ ընդդիմության անդամներ Յամիլ Սանտորոն և Անտոնիո Ֆրատամիկոն դատական հայց են ներկայացրել դաշնային դատարան՝ մեղադրելով Ֆերնանդեսին սոցիալ հեռավորության պահպանման սանիտարային կանոնների խախտումը հրահրող իրավիճակ ստեղծելու համար։

«Պետության ղեկավարը խախտել է սահմանադրությամբ սահմանված հիմնարար սկզբունքներից մեկը՝ հավասարության սկզբունքը։ Ակնհայտ է, որ հուղարկավորությունների կազմակերպման հետ կապված երկակի չափանիշներ են կիրառվում։ Ամեն ինչ կախված է նրանից՝ հանրահայտ է հանգուցյալը, թե ոչ։ Եթե ոչ, ապա կիրառվում են COVID-19-ի կանխարգելման ստանդարտ կանոններ, իսկ եթե հանրահայտ է՝ չեն կիրառվում, և դա թույլ է տալիս միլիոնավոր մարդկանց հավաքվել Պլասա դե Մայոյում (Բուենոս Այրեսի կենտրոնական հրապարակը - խմբ.), հարակից փողոցներում ու Կառավարության տանը», - նշված է ընդդիմության ներկայացրած հայցում։

Հիշեցնենք, որ աշխարհահռչակ ֆուտբոլիստ, ֆուտբոլի աշխարհի չեմպոն Դիեգո Մարադոնան կյանքից հեռացել է նոյեմբերի 25-ին՝ 60 տարեկանում։ Մահվան պատճառ է դարձել սուր սրտային անբավարարությունը: Լեգենդար ֆուտբոլիստի մահվան կապակցությամբ երկրում եռօրյա սուգ է հայտարարվել:

Մարադոնային վերջին հրաժեշտ են տվել Բուենոս-Այրեսում` նախագահական պալատում: Նա հուղարկավորվել է Բուենոս Այրեսից 35 կմ հեռավորության վրա գտնվող Բելլա-Վիստա գերեզմանատանը, որտեղ հուղարկավորված են նաև աշխարհահռչակ ֆուտբոլիստի ծնողները։ Հուղարկավորության արարողությունն անցկացվել է նեղ շրջանակի մասնակցությամբ: