ՌԴ ԳԱ փորձագետը «տեսականորեն հնարավոր» է համարել Ադրբեջանը Նախիջևանի, Հայաստանը Լեռնային Ղարաբաղի հետ կապող նոր միջանցքների ստեղծումը
Հայաստանը Լեռնային Ղարաբաղի հետ կապող նոր միջանցք ստեղծելը հնարավոր է. տարածաշրջանում արդեն ճանապարհ կա Քարվաճառի շրջանի միջով, բայց այն ավելի երկար է և կարող է պահանջել տրանսպորտային հաղորդակցության անվտանգությունն ապահովող ռուս խաղաղապահների թվի ավելացում, իսկ լեռնային շրջաններում բոլորովին նոր ճանապարհ կառուցելը թանկ և երկարատև կլինի: Այս մասին «ՌԻԱ Նովոստի» գործակալության հետ զրույցում ասել է ՌԴ գիտությունների ազգային ակադեմիայի Համաշխարհային տնտեսության և միջազգային հարաբերությունների ինստիտուտ հետխորհրդային հետազոտությունների կենտրոնի ավագ գիտաշխատող Ստանիսլավ Պրիտչինը:
Փորձագետի կարծիքով՝ Քաշաթաղի շրջանը վերադարձրած ադրբեջանական իշխանությունների՝ նաև Բերձոր քաղաքը վերադարձնելու տրամաբանությունը, հասկանալի է:
«Ադրբեջանը կցանկանար վերադառնալ Լաչին, վերադարձնել փախստականներին այնտեղ, քանի որ Ռուսաստանի խաղաղապահների վերահսկողության տակ գտնվող այս քաղաքի միջանկյալ, տարանցիկ կարգավիճակը այնքան էլ ձեռնտու չէ Ադրբեջանի ղեկավարությանը. նրանք առաջարկում են փոխզիջման տարբերակներ»,-նշել է փորձագետը:
Նրա խոսքերով` «աշխարհագրական տեսանկյունից Հայաստանն ու Ղարաբաղն իրար միացնող ամենակարճ երթուղին անցնում է Լաչինով»:
«Եթե մենք դիտարկենք այլընտրանքային ուղին՝ Քարվաճառի շրջանի տարածքով, այն ավելի երկար է, և այդ պայմաններում երթուղին ապահովելու համար անհրաժեշտ կլինեն այլ քանակությամբ խաղաղապահներ: Բայց սա այնպիսի հարց է, որն Ալիևը դնում է որպես բանակցային, ինչը նրան թույլ կտա հետագայում քննարկել այն»,-նշել է Պրիտչինը:
Նա ընդգծել է, որ Քարվաճառի շրջանի ճանապարհը կառուցված է, բայց «այլ հարց է, որ բավականին դժվար է այն ապահովել նույն անվտանգությամբ և նույն չափանիշներով, ինչ Լաչինի միջանցքը, քանի որ ավելի երկար է», իսկ լեռնային տեղանքում բոլորովին նոր ճանապարհ կառուցելը կլինի «շատ թանկ և ժամանակատար»:
«Ինչ վերաբերում է Նախիջևանն Ադրբեջանին կապող միջանցքին, ապա սկզբունքորեն ամեն ինչ ասված է նոյեմբերի 10-ի հայտարարության մեջ: Փաստորեն, միջանցք պետք է ստեղծվի, մոտավորապես նույն անվտանգության միջոցներով, ինչ Լաչինի միջանցքում, միայն թե սա անցնելու է Հայաստանի հարավային հատվածով և գտնվելու է Իրանի հետ Հայաստանի հարավային սահմանի պաշտպանությունը ապահովող Ռուսաստանի Դաշնության սահմանային ծառայության վերահսկողության տակ»,-ասել է փորձագետը՝ հավելելով, որ «այս ամենը նշված է հայտարարության մեջ և իրագործելի է»:
Նրա խոսքով՝ պետք է տեսնել, թե որքանով է ենթակառուցվածքը թույլ տալիս ապահովել նման երթուղի Հայաստանի տարածքով, այդ ճանապարհները դժվար թե լինեն կատարյալ վիճակում:
Միևնույն ժամանակ, ըստ Պրիտչինի, և Ադրբեջանը Նախիջևանի հետ կապող միջանցքի, և Հայաստանն ու Լեռնային Ղարաբաղը կապող նոր երթուղու ստեղծումը «տեսականորեն հնարավոր են»:
Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների մի մասին արդեն տեղակայվել է Արցախում։










