Իշխանություն չունենք, դրա համար էլ համայնքների բնակիչներն են բանակցում ադրբեջանցիներ հետ. GPS սահմանազատումը ևս մեծագույն պարտություն է. Կարեն Հովհաննիսյան

14:02 • 07.12.20

Թե ինչու են համայնքների բնակիչները բանակցում ադրբեջանցի զինվորականների հետ, կա մեկ պատասխան՝ բառի բուն իմաստով չունենք իշխանություն, որն իրավասու լինի այդ սահմանազատման աշխատանքներին մասնակից լինել: Tert.am-ի հետ զրույցում նման կարծիք հայտնեց ռազմական փորձագետ Կարեն Հովհաննիսյանը:

«Այսինքն, չկա մի այնպիսի մարմին կամ գերատեսչություն, որը հանձն կառնի այդ գործառույթը և կիրականացնի: Դա կարող են անել Տարածքային կառավարման նախարարությունը, մարզպետարանները, բայց չեն իրականացնում այդ գործառույթը և ստիպված յուրաքանչյուր համայնք մի կերպ փորձում է իր գլխի ճարը տեսնել»,- նշեց նա:

Կարեն Հովհաննիսյանը նաև խնդրահարույց է համարում այն սկզբունքները, որով տեղի է ունենում սահմանազատումը՝ խորհրդային սահմաններով, GPS համակարգերով:

«Որպես այդպիսին խորհրդային ժամանակաշրջանում չեն եղել սահմաններ, այդ ժամանակ եղել են ոչ թե պետությունների, այլ կոլտնտեսությունների համար նախատեսված սահմանազատումներ: Այդ կոլտնտեսությունները ժամանակին նաև միմյանց միջև ձեռք են բերել պայմանավորվածություն, որ 1, 2 կամ 5 տարով այս կամ այն տարածքը ժամանակավորապես տրամադրում են մեկ այլ կոլտնտեսության, որը խնդիր ունի արոտի հետ: Եվ այսօր հիմք ընդունել Google-ով գծած քարտեզը ու դրանով GPS-ով սահմանազատում անել, դա ամենաթող վիճակի վկայությունն է»,- ասաց նա

Փորձագետի խոսքով՝ սահմանազատումը բավականին բարդ պրոցես է, ճշգրտումները տարիներ են տևում: Նա նկատեց, որ մինչ այսօր Խորհրդային միության շատ երկրներ խնդիրներ ունեն սահմանների հետ կապված: Օրինակ՝ Վրաստանի և Ադրբեջանի դեպքում նմանատիպ սահմանային խնդիր է Գարեջայի վանական համալիրը:

«Այս GPS սահմանազատումը ևս համարում եմ մեծագույն պարտություն` դիվանագիտական դաշտում, որովհետև աշխարհում չկա նման օրինակ, որ մասնավոր ընկերության տրամադրած տվյալների հիման վրա իրականացվեն միջպետական գործառույթներ, որը դառնալու է լեգիտիմ սահման: Այսինքն, թողած վավերական քարտեզները, որոնք հաստատված են կնիքով, ստորագրություններով, մենք վերցնում ենք մասնավոր ընկերության տվյալները և գծում ենք սահման»,- ասաց Կարեն Հովհաննիսյանը:

Նոյեմբերի 10-ի եռակողմ հայտարարության ստորագրումից հետո էլ, ըստ նրա՝ հնարավոր է տարածքների վերաբերյալ բանակցություններ վարել և ի նպաստ հայկական կողմի որոշումների հանգել:

«Կան բոլոր շանսերը, որ մենք կարող ենք սահմանազատումն անել այնպես, որ մենք ունենանք ռազմավարական նշանակություն ունեցող դիրքեր: Բայց վստահ չեմ, որ այս իշխանությունը կարող է նման աշխատանք տանել, եթե կարողանար տանել, ապա գոնե այլ շարադրությամբ փաստաթուղթ կստորագրվեր: Այդ փաստաթուղթը հայոց պատմության ամենաազգադավ փաստաթուղթն էր»,- ասաց ռազմական փորձագետը: