Վատիկանում ուկրաինական կարգավորման շուրջ բանակցություններ վարելու պայմանավորվածություններ չկան. Կրեմլ

14:16 • 22.05.25

ՌԴ նախագահի մամուլի քարտուղար Դմիտրի Պեսկովը հայտարարել է, որ Վատիկանում ուկրաինական կարգավորման շուրջ բանակցություններ վարելու վերաբերյալ պայմանավորվածություններ չկան:

Ավելի վաղ Wall Street Journal-ը, հղում անելով աղբյուրներին, գրել էր, որ հունիսի կեսերին Վատիկանում կարող է կայանալ Ռուսաստանի և Ուկրաինայի միջև բանակցությունների փուլ։

«Ոչ, այս հարցում պայմանավորվածություններ չկան», - ասել է Պեսկովը՝ պատասխանելով լրագրողի հարցին, թե արդյոք նոր տեղեկություններ կան ուկրաինական և ռուսական պատվիրակությունների հաջորդ բանակցությունների մասին։

Օրերս ԱՄՆ նախագահ Դոնալդ Թրամփը հայտարարել էր, որ Հռոմի պապ Լևոն XIV-ը հետաքրքրություն է հայտնել Վատիկանում հյուրընկալել Ռուսաստանի և Ուկրաինայի միջև բանակցությունները։ Այս մասին նա գրել է իր Truth Social հարթակում մայիսի 19-ի երեկոյան։

«Վատիկանը, ի դեմս Հռոմի պապի, հայտարարել է, որ շատ հետաքրքրված է բանակցությունների հյուրընկալմամբ։ Թող գործընթացը սկսվի՛», – գրել էր Թրամփը։