Սաուդյան Արաբիան Բրիտանիայից օգնություն է խնդրել հութիներին զսպելու համար. Bloomberg

Սաուդյան Արաբիան Մեծ Բրիտանիայի վարչապետ Էնդի Բերնեմից ռազմական և դիվանագիտական օգնություն է խնդրել եմենյան «Անսար Ալլահ» հութիների ապստամբական շարժումը զսպելու և նավթային ենթակառուցվածքների վրա հարձակումներից պաշտպանվելու համար։ Այդ մասին, հղում անելով աղբյուրներին, հայտնել է Bloomberg գործակալությունը։

Նրա տեղեկություններով՝ Լոնդոնը պատրաստակամություն է հայտնել օգնել Էլ Ռիադին տարածաշրջանում կայունության պահպանման հարցում և արդեն ռազմական խորհրդականներ է ուղարկել արաբական թագավորություն։

Ինչպես նշել է գործակալությունը, բրիտանացի պաշտոնյաները զգուշացրել են Բերնեմին, որ հութիների կողմից Բաբ էլ Մանդեբի նեղուցի հնարավոր զավթումը կարող է «աղետալի ազդեցություն» ունենալ միջազգային նավագնացության և համաշխարհային տնտեսության վրա։

Ավելի վաղ Financial Times թերթը հայտնել էր, որ Սաուդյան Արաբիայի թագաժառանգ Մուհամմադ բեն Սալման Ալ Սաուդը դիմել էր ԱՄՆ նախագահ Դոնալդ Թրամփին՝ հութիներին զսպելու համար օդային ծածկույթ տրամադրելու խնդրանքով, սակայն Վաշինգտոնը մերժել էր Էլ Ռիադին՝ պատճառաբանելով Իրանի վրա կենտրոնացվածությունը։

Եմենում իրավիճակը կտրուկ սրվել էր սեպտեմբերի սկզբին, երբ ապստամբական շարժումը հարձակման էր անցել երկրի հարավ-արևմուտքում: Վերգետնյա առաջխաղացմանը զուգահեռ՝ հութիները սկսել էին հարվածներ հասցնել Կարմիր ծովի առափնյա շրջաններին և Տաիզ քաղաքի շրջակայքին՝ ձգտելով կտրել դեպի Մոխա նավահանգիստ տանող ճանապարհները և առաջ շարժվել դեպի Բաբ էլ Մանդեբի նեղուցի մոտակայքում գտնվող շրջաններ, որոնք ռազմավարական նշանակություն ունեն։